amérikadiki zhurnalistlar: amérika taratquliri pelestin mesilisige toghra muamile qilishi kérek

türkiye awazi radiyosi xewiri: «amérika taratqulirining pelestin mesilisige tutqan pozitsiyesi toghrisida ochuq xet» mawzuluq mektupta, amérikada xewer yazghanda «israiliye ishghaliyiti we pelestinliklerge qiliniwatqan sistémiliq zulumni yoshurush»qa xatime bérish telep qilindi.

«washingiton pochtisi», «wal strit jornal» we «los anzhélés waqti» qatarliq dangliq axbarat orunlirining muxbirlirinimu öz ichige alghan 514 zhurnalist imza qoyghan mezkur mektupta: «heqiqetni namayan qilish we küchlüklerdin hésab sorash axbaratchiliqning asasiy prinsipliri hésablinidu. biraq, nechche on yildin buyan axbarat sahemiz israiliye we pelestin xewerlirige kelgende bu qimmet qarashlardin waz kechti. biz oqurmenlirimizni xewerning israiliyening herbiy ishghaliyiti we irqiy ayrimichiliq sistémisigha munasiwetlik eng négizlik tereplirini yoshuridighan bayan qilish shekli arqiliq aldiduq» déyildi.

mektupta, nechche on yildin buyan dawamlishiwatqan axbaratchiliqtiki bu xata qilmishqa oqurmenler we heqiqetlerge hörmet qilish yüzisidin xatime bérish we axbaratchiliqtiki yönilishni derhal özgertishning bir mejburiyet ikenliki eskertilip: «israiliyening pelestinliklerge yürgüzüwatqan sistémiliq bésimning pakitliri nahayiti köp bolup, bular yoshurulmasliqi kérek» dégen ibarilerge orun bérildi.

mektupta, kishilik hoquqni közitish teshkilatining 27 - aprél élan qilghan doklatining, israiliye dairilirining irqiy ayrimichiliq siyasiti yürgüzüp, insaniyetke qarshi jinayet ötküzgenlikining xatirilengenliki tekitlendi.

mektupta yene «muxbirlar bolush süpitimiz bilen, xewerlirimizning bu réalliqni eks ettürgen - ettürmigenlikini tekshürüshimiz kérek» déyilip, eng axirqi qétim yüz bergen sherqiy quddusning sheyx jerrah rayonidiki pelestinliklerning öyliridin mejburiy qoghlap chiqirilishi, israiliye küchlirining ramizandiki mesjidi eqsagha basturup kirish qilmishi we israiliyening ghezzege qaratqan hawa hujumliri qatarliq weqelerde ishlitilgen xewer tili buninggha misal qilip körsitildi.

israiliyening qorshawi astidiki ghezze rayonigha 10-mayda bashlighan hawa hujumliri 21-mayda hamas bilen tüzülgen urush toxtitish kélishimige asasen axirilashqan idi.

israiliye armiyesining ghezze rayonigha qilghan hujumlirida 66 kichik bala we 39 ayalni qoshqanda, jemiy 254 pelestinlik shéhit bolghan, 1948 kishi yarilanghan, minglarche bina pütünley yaki qismen weyran bolghanidi.