israiliye saqchiliri mesjidi eqsada bamdat namizidin kéyin hujum bashlidi
israiliye saqchiliri ishghaliyiti astidiki mesjidi eqsada bamdat namizidin kéyin yene bir qétim pelestinlik yashlargha hujum qildi.
türkiye awazi radiyosi xewiri: quddus islamiy fondi jemiyetliri idarisidin ismini ashkarilashni xalimaydighan bir emeldar, pelestinlik yashlarning herem-sherifte bamdatni oqughandin kéyin qible meschiti bilen qubbetus sehra otturisidiki rayongha yighilghanliqini bildürdi.
tekbir we shoarlarni towlighan yashlargha israiliye saqchilirining plastik oq étip mudaxile qilghanliqini we pelestinlik yashlarningmu saqchilargha tash étip qarshiliq körsetkenlikini éytti.
pelestinlik yashlarning mesjidi eqsadiki qible meschiti aldida israiliye saqchilirigha tash étip qattiq inkas qayturghanliqini tilgha alghan mezkur emeldar, israiliye saqchilirining bolsa el-magharibe (buraq-marakeshlikler) derwazisi rayonidin yashlarni nishan qilip oq atqanliqini uqturdi. sherqiy quddusning kona sheher rayonigha jaylashqan herem-sheriftiki weqelerning anche chong emeslikini, lékin bir qisim yashlarning yarilanghanliqini eskertti.
mesjidi eqsada israiliye saqchiliri bilen pelestinlik yashlar otturisidiki toqunushlar hazirmu dawamlashmaqta.
israiliye saqchiliri tünügün kechte mesjidi eqsadiki tarawi namizidin kéyin yene bir qétim pelestinlik yashlargha awaz bombisi bilen hujum qilghan, emma weqeler bek chongiyip ketmestin axirlashqan idi.
tünügün kechte yene mesjidi eqsa jaylashqan kona sheherning demeshiq derwazisida, israiliye saqchilirining pelestinliklerge qilghan mudaxiliside 27 pelestinlik yarilanghan idi.
nechche kündin béri dawamlashqan israiliye hujumlirida shehid bolghanlarning sani 35 ke yetti we yarilanghanlarning sani 200 din éship ketti.
