mesjidi eqsagha qilinghan hujumlar qattiq naraziliq qozghidi

israiliye saqchilirining ishghal astidiki sherqiy quddusqa jaylashqan mesjidi eqsada ibadet qiliwatqan pelestinliklerge hujum qilishi pütkül dunyaning qattiq naraziliqini qozghidi.

1636439
mesjidi eqsagha qilinghan hujumlar qattiq naraziliq qozghidi

türkiye awazi radiyosi xewiri: amérika qoshma ishtatliri, israiliye saqchilirining mesjidi eqsada we quddusning bashqa rayonlirida pelestinliklerge qaritilghan zorawanliq heqqide élan qilghan bayanatida, tereplerni «zorawanliqqa xatime bérish» ke chaqirdi.

amérika qoshma ishtatliri tashqi ishlar ministirliqi bayanatchisi néd prays teripidin élan qilinghan bayanatta, quddustiki zorawanliq mesilisi heqqide israiliye saqchilirining biwasite eyiblenmesliki, barghanséri küchiyiwatqan zorawanliqning axirlishishi mesiliside hem israiliye hem pelestin terepning «soghuqqan» bolushqa chaqiriq qilinishi diqqet qozghidi.

liwiye bash ministiri abdulhamid dibeybe, ammiwi ortaqlishish tor bétidiki sehipiside élan qilghan bayanatida, israiliye saqchilirining mesjidi eqsada jamaetke hujum qilishini qattiq eyiblep mundaq dédi: «pelestin xelqining heqqaniy kürishide hemishe pelestinliklerning yénidimiz, israiliyening, tunji qiblimiz mesjidi eqsagha qilghan hujumi we pelestinliklerni oxshishi héch körülüp baqmighan shekilde yurt – makanlirini qoghlap chiqirishini eyibleymiz. xelqara jemiyet, pelestinliklerning menpeeti üchün adil bir chare izdesh mesuliyitini ada qilishi kérek.»

iyordaniye tashqi ishlar ministirliqi bayanatchisi dayf elfayiz, mesjidi eqsagha we tinch halette ibadet qiliwatqanlargha qaritilghan hujumlarni, «heq - hoquqlarning ochuq – ashkara depsende qilinishi we wehshilerche qilmish» dep atap, hemde buni qobul qilghili bolmaydighanliqini bildürüp, bu hujumlarni eyiblidi.

u, israiliye dairilirini, xelqaraliq kishilik hoquq qanun – belgilimilirige asasen, ishghalchi küch süpitide ehdilirige riaye qilishqa, kishilik hoquq depsendichilikliri, hujumlar we ighwagerliklerge xatime bérishke chaqirdi.

pakistan islam jamaiti partiyesi rehbiri sirajul heq, «israiliye küchlirining», musulmanlarning tunji qiblisi mesjidi eqsada ibadet qilishni toxtitish hoquqi yoqluqini bildürdi, hemde qutluq ramizan éyida, israiliye küchlirining mesjidi eqsagha qilghan hujumini qattiq eyibleydighanliqlirini tekitlep mundaq dédi: «pakistan xelqi pelestindiki qérindashlirini qollimaqta, hemde pelestinliklerning pidakarliqi we jasaritige yuqiri baha bermekte.»



مۇناسىۋەتلىك خەۋەرلەر