вухән вируси ваксиналириниң патент һоқуқи әмәлдин қалдурулуши мумкин

түркийә авази радийоси хәвири: йавропа иттипақиниң йуқири дәриҗилик бир әмәлдари 7-8-май күнлири португалийәдә өткүзүлидиған йиғин тоғрисида мәлумат берип: «йиғинда вухгн вируси ваксиналириниң патент һоқуқини әмәлдин қалдуруш мәсилисини музакирә қилиш вә конкрет шәкилдә қандақ қилғили болидиғанлиқини музакирә қилиш үчүн кәң даирилик пикир бирлики бар» деди.

йавропа иттипақида ишләпчиқирилған ваксиналарниң тәхминән йериминиң башқа дөләтләргә експорт қилинғанлиқини хатириләткән мәзкур әмәлдар, буниңға қарита ваксина ишләпчиқарған бәзи дөләтләрниң експортқа чәклимә қойғанлиқини әскәртти.

у дунйа сода тәшкилати директори нгози оконҗо ивела (Ngozi Okonjo-Iweala) ниң ваксиналарға мунасивәтлик сода қаидәлирини вақитлиқ әмәлдин қалдуруш тоғрисидики текстни муназирә қилиш пикрини қоллайдиғанлиқлирини билдүрди.

йавропа иттипақи комитетиниң башлиқи урсула фондерлейин (Ursula von der Leyen) му ваксиналарниң патент һоқуқини әмәлдин қалдуруш мәсилисини музакирә қилишни қоллайдиғанлиқини ейтти.

америка пирезиденти җо байдинму ваксиналарға мунасивәтлик патент һоқуқи мәсилисидә американиң мәйданиға өзгәртиш киргүзүп, бу һәқ-һоқуқларни әмәлдин қалдуруш пикрини қоллайдиғанлиқини билдүргән иди.

америка сода вәкили катрин тай (Katherine Tai) ваксиналарниң ишләпчиқирилиш миқдарини көпәйтиш үчүн патент һоқуқини әмәлдин қалдурушни қоллайдиғанлиқлирини вә дунйа сода тәшкилатиниң бу һәқтики музакирәлиригә қатнишидиғанлиқлирини ейтти.

дунйа сәһийә тәшкилатиниң директори тедрос адханом ғебрейисус (Tedros Adhanom Ghebreyesus), американиң вухән вируси ваксиналириниң ишләпчиқириш миқдарини көпәйтиш үчүн патент һоқуқиниң әмәлдин қалдурулушини қоллиғанлиқини мәдһийәлиди.

у: «американиң һәрикити җәсур һәрикәт. бу вухән вирусға қарши туруштики пәвқуладдә пәйт» деди.