musulman qérindashlar teshkilati türkiyege rexmet éytti
musulman qérindashlar teshkilati jumhur reis rejep tayyip erdoghanni, türkiye hökümitini we xelqini qedirleydighanliqini élan qildi.
türkiye awazi radiyosi xewiri: musulman qérindashlar teshkilati rehberlik kéngishi muawin reisi ibrahim munir yazma bayanatida, türkiye teripidin siyasiy panahlanghuchi süpitide qobul qilinghan musulman qérindashlar teshkilati qatarliq her xil misir siyasiy küchlirining wekilliri orun alghan misir ammiwi teshkilatlar fédératsiyesi ijraiye kéngishi reisining 21- aprélda munasiwetlik organlar bilen körüshüp, türkiyediki misirliq panahlanghuchilarning teleplirini yetküzüsh we ularning ehwalini aydinglashturush üchün paytext enqerede ziyarette bolghanliqini bildürdi.
musulman qérindashlar teshkilati rehberlik kéngishi muawin reisi ibrahim munir özlirining türkiyede ishench, tinchliq we bixeterlikke ige bolghanliqini eskertti. misirliq panahlanghuchilarning mesililirige qulaq salghan, dertlirige yetken we azblirigha ortaq bolghan barliq idare - organ we teshkilatlargha chongqur minnetdarliqini bildürüp, türkiye xelqining allahtin qalsila, özliridin yardem telep qilghan hemmila kishige derwazisinii achqanliqigha we panahlanghuchilargha ümid bolghanliqigha pütün dunyaning shahit bolghanliqini tekitlidi.
ibrahim munir bayanatida, «musulman qérindashlar teshkilati bolush süpitimiz bilen türkiye jumhur reisge, hökümitige we xelqi bilen birge pütün türkiyege minnetdarliq bildürüshni qerz hésablaymiz, bu munasiwet bilen biz méhmandostluqning teqezzasigha uyghun jawap qayturushta wapadar bolushqa, mesuliyetlirimizni toluq ada qilishqa, shundaqla hazir yolgha qoyuluwatqan barliq belgilime we qanunlargha hörmet qilish bilen birge döletning muqimliqi we bixeterlikige qilchimu ziyanliq ish qilmasliqqa wede bérimiz» dédi.
