بىرمادىكى نامايىشلاردا قازا قىلغانلار ئومۇمىي سانى 753 كە يەتتى

تۈركىيە ئاۋازى رادىيوسى خەۋىرى: سىياسىي مەھبۇسلارغا ياردەم بېرىش تەشكىلاتىنىڭ كۈندىلىك دوكلاتىدا، يېقىنقى 24 سائەت ئىچىدە يەنە ئىككى كىشىنىڭ قازا قىلغانلىقى، شۇنىڭ بىلەن، ھەربىي –  سىياسىي ئۆزگىرىشكە قارشى باشلانغان نامايىشلاردا قازا قىلغانلار ئومۇمىي سانىنىڭ 753 كە يەتكەنلىكى، بۇنىڭدىن باشقا 3441 ئادەمنىڭ نازارەت ئاستىغا ئېلىنغانلىقى، 1179 نامايىشچى ئۈستىدىن تۇتۇش بۇيرۇقى چىقىرىلغانلىقى قاتارلىق ئۇچۇرلارغا ئورۇن بېرىلدى.

يەنە بىر تەرەپتىن، ھەربىي – سىياسىي ئۆزگىرىشكە قارشى «كارېن مىللىي بىرلىكى» ناملىق ئېتنىك قوراللىق گۇرۇپپىنىڭ، دۆلەتنىڭ جەنۇبىدىكى چېگراسىدىكى (تايلاند چېگراسى) بىرما ئارمىيەسىنىڭ بىر ھەربىي بازىسىنى قولغا كىرگۈزگەنلىكى بىلدۈرۈلدى.

كارېن مىللىي بىرلىكى بايانات ئىشلىرى ئىشخانىسى بايانات ئېلان قىلىپ، شۇ جاي ۋاقتى سائەت 4 تىن 30 مىنۇت ئۆتكەندە كارېن ئۆلكىىسنىڭ مۇتراۋ رايونىدىكى ھەربىي بازىغا باستۇرۇپ كىرىپ قولغا كىرگۈزگەنلىكلىرىنى ئۇقتۇردى. ئەمما باياناتتا، ئادەم ئۆلۈش ياكى يارىلىنىش ئەھۋالى توغرىسىدا مەلۇمات بېرىلمىدى.