yaponiyede kowid -19 yuqumi sewebidin jiddiy halet yene élan qilinidighan boldi
yaponiyening paytexti tokyo bilen bezi ölkilerde ewj éliwatqan kowid -19 yuqumi sewebidin qaytidin jiddiy halet élan qilinidighan boldi.
türkiye awazi radiyosi xewiri: yaponiyede kowid -19 tedbirlirige mesul kabinét ezasi nishimura yasutoshi muxbirlarni kütüwélish yighinida, tajisiman wirus we uning wariyantlirining dölet miqyasida qaytidin köpiyishke bashlighanliqini éytti.
nishimura yasutoshi yuqumgha qarshi küreshte jiddiy halet élan qilishning muhimliqini tekitlep, «wirusning yuqumlinish nisbiti yuqiri wariyantlirini kontirolluq astigha alalishimiz üchün téximu küchlük tedbirlerni yolgha qoyushqa toghra kélidu» dédi we xelqni yaponiyede 29- apréldin 5 – mayghiche ötküzülidighan «ogon shukan» (altun hepte) dem élish mezgilini öydin sirtqa chiqmay ötküzüshke chaqirdi.
nishimura yasutoshi 29-apréldin 5-mayghiche bolghan ariliqta yuqumlinish nisbitining téximu yuquri örlishidin endishe qiliwatqanliqini shunga xelqning öyidin sirtqa chiqmasliqi kéreklikini bildürdi.
bash ministir suga yoshihidému hökümettiki kowid -19 meslihetchiler komitétining tewsiye qararidin kéyin, ijra qilinidighan tedbirlerni élan qilidighan boldi.
paytext tokyo bilen osaka, xiyogo we kyotoda 25 – aprél bashlinidighan jiddiy halet 11-mayghiche küchke ige bolidu.
jiddiy halet ilgirimu yaponiyening oxshimighan jaylirida, 2020-yili apréldin 2021-yili yanwaghiche bolghan jeryanda a ikki qétim yolgha qoyulghan idi.