dunya sehiye teshkilati 25 – 59 yash ariliqidiki kishiler heqqide agahlandurdi
dunya sehiye teshkilati bash diréktori tédros adanom gébréyus dunya miqyasida 25-59 ariliqidiki kishiler arisida «kowid – 19» wirusi bilen yuqumlinish we doxturxanida yétish nisbitining endishilik shekilde köpiyiwatqanliqi toghruluq agahlandurdi.
türkiye awazi radiyosi xewiri: gébréyus, dunya sehiye teshkilatining shiwéytsariyening jenwe shehiridiki merkizide widéo konférans wasitisi arqiliq ötküzülgen axbarat élan qilish yighinida, mundaq dédi: «aldinqi hepte <kowid – 19> wirusi bilen yuqumlanghuchilar sani arqimuarqa 8 – heptide köpiyip ketti we 5.2 milyondin köp kishining yuqumlanghanliqi bildürüldi. bu hazirghiche bir hepte ichide körülgen eng köp yuqumlinish ehwali idi.»
dunya miqyasida «kowid – 19» yuqumi sewebidin qaza qilghanlar saniningmu arqimuarqa 5 – heptide köpiyip ketkenlikini éytqan gébréyus, dunyaning herqaysi jaylirida 25 – 59 yash ariliqidiki kishiler arisida kowid – 19» wirusi bilen yuqumlinish we doxturxanida yétish nisbitining endishilik shekilde köpiyiwatqanliqi toghruluq agahlandurdi, hemde buning sewebining yéngi wariyantlar we yash quramigha yetkenler otturisidiki «ijtimaiy alaqe» ikenlikini qeyt qildi.
waksina emletküzüsh mesilisi toghriliqmu toxtalghan gébréyus, dunya miqyasida hazirghiche 832 milyon quta «kowid – 19» waksinisining emlengenlikini tekitlep mundaq dédi: «lékin waksinilarning % 82 tin köpreki yuqiri yaki yuqiri – ottura hal kirimlik döletlerge ketken bolsa, töwen kirimlik döletler peqet% 0.2 waksinighila érishelidi.»