birma öktichiliri sherqiy jenubiy asiya ittipaqi yighinigha qatnishishni telep qildi

türkiye awazi radiyosi xewiri: siyasiy tutqunlargha yardem jemiyiti namayishlarda jénidin ayrilghanlar toghrisida doklat élan qildi.

doklatta, birmada yéqinqi 24 saette yette kishining jénidin ayrilghanliqi bildürüldi. buning bilen, namayishlarda jemiy jénidin ayrilghanlar sani 737 ge, tutqun qilinghanlar sani 3 ming 229 gha we  üstide tutush qarari chiqirilghanlar sani 930 gha chiqti.

herbiy özgirishke qarshi öktichi parlamént ezaliri teshkilligen dölet parlaménti wekil komitéti herbiy hökümetke qarshi qurghan «xelq hökümitining», birma kirizisini muzakire qilish üchün 24-aprél (2021) hindonéziyede ötküzülidighan sherqiy jenubiy asiya döletler ittipaqi rehberler yighinigha qatnishishni telep qilghanliqi qeyt qilindi.

xelq hökümiti wekilliridin moé zawo amérika awazining ziyaritini qobul qilghanda: «eger sherqiy jenubiy asiya döletliri ittipaqi birmadiki kirizisni hel qilishni xalisa, xelqning qollishigha érishken xelq hökümitini muzakirege qatnashturmastin héchqandaq muweppeqiyetke érishelmeydu» dédi.

u xelq hökümiti wekillirining teklip qilinishining, herbiy özgirishning muweppeqiyetlik bolmasliqi nuqtisidin muhim ikenlikini eskertip: «hazirghiche sherqiy jenubiy asiya döletliri ittipaqidin bizge teklip kelmidi. bu mesilining jiddiy türde muzakire qilinishini telep qilimiz» dédi.

herbiy özgirishke qarshi öktichi parlamént ezaliri 16-aprél herbiy özgirishni qanunsiz ikenlikini bildürüp, xelqning awazi bilen saylanghan parlamént ezaliridin teshkillengen «xelq hökümiti» qurghanliqlirini élan qilghan idi.

xelq hökümiti kabéntida, 1-féwral herbiy özgirishidin burun tutqun qilinghan birmaning sabiq pirézidénti win myint «pirézidént» liqqa, tutqun astidiki dölet rehbiri ang san suchi «dölet meslihetchi» likige körsitilgen idi.