birmadiki namayishlarda qaza qilghanlar omumiy sani 726 ge yetti

türkiye awazi radiyosi xewiri: siyasiy mehbuslargha yardem bérish teshkilatining kündilik doklatida, yéqinqi 24 saet ichide yene 12 kishining qaza qilghanliqi, shuning bilen, herbiy –  siyasiy özgirishke qarshi bashlanghan namayishlarda qaza qilghanlar omumiy sanining 726 ge yetkenliki, buningdin bashqa 3151 ademning nazaret astigha élinghanliqigha dair uchurlargha orun bérildi.

doklatta, siyasiy özgirishke qarshi chiqqan 813 adem üstidin tutush buyruqi chiqirilghanliqi, yéqinqi 24 saet ichide nazaret astigha élinghanlarning 36 nepirining namayishni orunlashturghuchilar ikenliki qeyt qilindi.

yene bir tereptin, xelq teripidin saylanghan birmaliq parlamént ezalirining burunqi hökümetni eslige keltürüsh meqsitide qurulghan dölet parlaménti wakalet komitétining, teyyarliqini qiliwatqan puqralar ötkünchi hökümitining ichki kabinétini bügün élan qilidighanliqi bildürüldi.

«hazirqi birma» xewerler torigha bayanat bergen dölet parlaménti wakalet komitéti ezasi, 31  - mart élan qilinghan fédératip démokratiye kélishimining rohigha asasen, waqitliq hökümet ichki kabinétini békitip chiqqanliqini we kabinétning xelq teripidin saylanghan kishilerdin teshkil tapidighanliqini otturigha qoydi.