بىرما ئارمىيەسى بىر جامەدە بۇلاڭچىلىق قىلدى

تۈركىيە ئاۋازى رادىيوسى خەۋىرى: بىرما «Now» تورىنىڭ بىر خەۋىرىدە بىلدۈرۈلىشىچە، بىرما ئارمىيەسى تۈنۈگۈن (2021-يىلى 14-ئاپرېل) ماندالاي شەھىرىگە قاراشلىق ميىتنگې (Myitnge) ناھىيەسىدە ھەربىي ئۆزگىرىشكە قارشى نامايىش قىلغان بىر گۇرۇپپا دۆلەت خىزمەتچىلىرىنى تۇتقۇن قىلىشقا ئۇرۇنغان. نامايىشچىلارنىڭ قارشىلىق كۆرسىتىشى بىلەن ئەسكەرلەر ئاممىنى ئوققا تۇتقان ۋە نەتىجىدە ئىككى كىشى جېنىدىن ئايرىلغان.

ئەسكەرلەر شۇ كۈنى ميىتنگېغا جايلاشقان بىر جامەگە بېسىپ كىرىپ، جامائەتتىن يىغىلغان ئىئانە پۇللار ساقلانغان ساندۇقنى بۇلىغان.

بىرمادا تۈنۈگۈن جېنىدىن ئايرىلغانلار بىلەن، ھەربىي ئۆزگىرىشتىن بۇيان خەۋپسىزلىك كۈچلىرىنىڭ قوراللىق باستۇرۇشىدا ئۆلتۈرۈلگەن نامايىشچىلار سانى 716 گە چىقتى.