engliye 30 yashtin töwenlerge astra zénéka waksinisini emleshni toxtitishni qarar qildi

türkiye awazi radiyosi xewiri: engliye dora we saqliqni saqlash mehsulatlirini nazaret qilip bashqurush orgini, oksford-astra zénéka waksinisining éghir késelliklerning aldini élishta yenila zor paydisi barliqini otturigha qoydi.

buning bilen birlikte, 3- ayning 31- künigiche 79 kishide qan uyulush peyda qilghanliqining bildürülgenliki, mezkur kishilerning 19 nepirining qaza qilghanliqi bildürülgen bayanatta, qanning uyulushigha némining seweb bolghanliqining éniqlinalmighanliqi qeyt qilindi.

qan uyulush alamiti körülgen 51 nepiri ayal, 28 nepiri er bolup jemiy 79 kishining 18 yash bilen 79 yash ariliqidiki kishiler ikenliki, qaza qilghan 19 kishidin üchining 30 yashtin töwen ikenliki tekitlendi.

qaza qilghan 19 kishining 14 nepirining méngiside, besh nepirining tomurlirida qan uyulush körülgenliki eskertildi.

engliye dora we saqliqni saqlash mehsulatlirini nazaret qilip bashqurush orginining bayanatidin kéyin,  waksina komitéti, yashlarda körülgen qan uyulush sewebidin 30 yashtin töwenlerge buningdin kéyin pifizér yaki modérna waksinisining emlinidighanliqini élan qildi.

bayanatta, oksford-astra zénéka waksinisining birinchi qétimliqini emletküzgenlerning oxshash waksinining ikkinchi qétimliqini emletse bolidighanliqi qeyt qilindi.

engliyede hazirghiche 20 milyondin artuq ademge astra zénéka waksinisining emlengenliki bildürülmekte.