astrazénéka waksinasini balilarda sinaq qilish toxtitildi
oksford uniwérstéti (Oxford) astrazénéka (AstraZeneca) shirkiti bilen tetqiq qilip yasighan wuxen wirusi(Kovid-19) waksinasini balilarda sinaq qilishni toxtatti.
türkiye awazi radiyosi xewiri: oksford uniwérstéti astrazénéka waksinasining balilarda sinaq qilishning toxtitilghanliqi toghrisida bayanat élan qildi.
bayanatta: «balilar klinkiliq tekshürüshide bixeterlik endishesi bolmisimu, biz engiliye dorigerlik we saqliqni saqlash mehsulatlirini nazaret qilip bashqurush orgini (MHRA) ning yéngi sinaqtin ilgiri chonglarda doklat qilinghan az uchraydighan qan tomur qétishish / qan tomur ösmisi (qan uyulush) ni tekshürüsh toghrisida qoshumche uchurgha érishishini ümid qilimiz» déyildi.
uniwérsitét féwral (2021) diki bayanatida, 6 yashtin 17 yashqiche bolghan 300 pidaiy bilen sinaq élip baridighanliqini bildürgen idi.
engiliye dorigerlik we saqliqni saqlash mehsulatlirini nazaret qilip bashqurush orgini engiliyediki oksford-astrazénéka waksinasi emlengen 18.1 milyon kishidin 30 ining qan nokchisigha giriptar bolghanliqini, ularning 7 nepirining 24-marttin bashlap jénidin ayrilghanliqini élan qilghan idi, emma hazirghiche qan nokchisi shekillinish bilen buning otturisida qandaq baghlinishning barliqini körsitidighan héchqandaq pakitning yoqluqini élan qilghan idi.
yawropa tébbiy dora idarisi (EMA) tünügün (2021-yili 6-aprél) astrazénéka waksinasi bilen qan nokchisi otturisida baghlinish barliqini, emma sewebining téxi éniqlanmighanliqini bildürgen idi.
bezi yawropa döletliri qan uyulushini keltürüp chiqiridighanliqini seweb qilip mezkur waksinani emleshni waqtinche toxtatqan yaki yéshigha asasen cheklimiler qoyulghan idi.
