ئامېرىكادا قانۇنسىز كۆچمەنلەر سانى يېقىنقى 15 يىلنىڭ ئەڭ يۇقىرى پەللىسىگە يەتتى

تۈركىيە ئاۋازى رادىيوسى خەۋىرى: جو بايدىن ھۆكۈمىتىنىڭ كۆچمەنلەر سىياسىتى توغرىسىدا گۇمانلىنىش پەيدا قىلغان مېكسىكا چېگراسىدىكى كۆچمەن ھەرىكەتلىرى داۋام قىلماقتا.

«ۋاشىنگتون پوچتىسى» گېزىتىنىڭ ئامېرىكا چېگرا ۋە تاموژنا مۇھاپىزەتچىلەر ئورگىنى (CBP) نىڭ سانلىق مەلۇماتلىرىغا ئاساسەن بەرگەن خەۋىرىگە قارىغاندا، مارتتا ئامېرىكا - مېكسىكا چېگراسىدىن ئۆتۈشكە ئۇرۇنۇش جەريانىدا تۇتۇلۇپ قالغان كۆچمەنلەر سانى 171 مىڭدىن ئېشىپ كەتكەن.

ئالاقىدار ئەمەلدارلار، بۇنىڭ 2006 - يىلدىن بۇيانقى ئەڭ يۇقىرى ئايلىق سانلىق مەلۇمات ئىكەنلىكىنى تەكىتلەپ، يانۋار ئېيىدا مېكسىكا چېگراسىدا تۇتۇلغان كۆچمەنلەر سانىنىڭ 78442 ئىكەنلىكى نەزەردە تۇتۇلسا، ئىككى ئاي ئىچىدە بۇ جەھەتتە ئېغىر ئېشىش كۆرۈلگەنلىكىنى قەيت قىلىشتى.

بۇنىڭدىن باشقا، مارتتا قولغا ئېلىنغان ھەمراھسىز كۆچمەن بالىلار سانى 2 - ئايدىكىگە سېلىشتۇرغاندا %99 ئېشىپ، 18 مىڭ 800 دىن ھالقىغان.