lawrow: urush bashlash ukrainani yoq qilidu

türkiye awazi radiyosi xewiri: rusiye tashqi ishlar ministiri sérgéy lawrow pérwiy (Pervıy) qanilining ziyaritini qobul qilip: «herbiylerning köpinchisi urush bashlash üchün qilghan her qandaq heriketning qanchilik ziyanliq ikenlikini bilidu. amérika qatarliq gherbning ighwachi siyasetchilirining, herbiylerni küshkürtmeslikini ümid qilimen» dédi.

sérgéy lawrow rusiye pirézidénti wladimir putinning mezkur kirizis toghrisida éytqanliridin neqil alghan halda: «donbasta yéngidin urush bashlashqa urunghanlar, ukrainani yoq qilidu. putin buni qisqa waqit ilgiri éytti we bu söz hazirmu küchke ige» dédi.

u amérika pirézidénti jo baydinning putinni «qatil», «amérika saylamlirigha arilashqanliqi sewebidin bedel töleydu»  dégenlikini xatirilitip: «baydinning a b s téléwiziyeside éytqanliri, nahayiti yirginchlik gepler. baydin pirézidént boldi we rusiyege qarshi émbargo yürgüzüshni, qattiq geplerni qilishni we her sahe boyiche bésim qilishni bashlidi. bu yillar boyiche dawamlishiwatidu» dédi.

u putinning baydingha «diplomatik» we «siyliq» shekilde jawab qayturup, körüshüshni teklip qilghanliqini, nahayiti epsus buninggha jawab kelmigenlikini qeyt qildi.

u rusiye bilen yawropa ittipaqi otturisidiki munasiwetler üstide toxtilip, yawropa ittipaqi bilen munasiwetlerni janlandurushqa teyyar ikenliklirini we yawropa ittipaqini teminlewatqan énérgiyelerni siyasiy bésim wastisi  qilip paydilanmaydighanliqlirini, emma yawropa ittipaqining «yaman niyetlik» heriketlirini jawabsiz qaldurmaydighanliqini  bildürdi.