сәуди әрәбистанда һамас әмәлдари муһәммәд әл һудариниң қамаққа елиниши наразилиқ қозғиди

түркийә авази радийоси хәвири: сәуди әрәбистанда тәхминән 2 йилдин буйан тутуп туруливатқан 83 йашлиқ һудариниң туғқанлири вә йеқинлири сәуди әрәбистан падишаһи салман бин абдуләзиз вә вәлиәһди муһәммәд бин сәлманға наразилиқ билдүрүп, һудари вә оғли һанини қойуп бериш чақириқида болди.

һудариниң иниси абдулмаҗид һудари байанатида, «биз бу йәргә сәуди әрәбистанда түрмигә ташланған, зулум қилинған, рак кесәл бир кишиниң барлиқини пүтүн дунйаға аңлитиш үчүн топландуқ» деди.

абдулмаҗид һудари рийад һөкүмитигә буниңдин илгириму мәсилә тоғрисида рәсмий йазма йоллиғанлиқини, әмма техичә җаваб алалмиғанлиқини әскәртти.

сәуди әрәбистан бихәтәрлик қисимлири җиддә шәһиридә турушлуқ һамас әмәлдари муһәммәд әл һударини2019-йили 4-апрелда қолға алған иди.

һамас байанатчиси һазим қасим 23-мартта елан қилған байантида, һудариниң созулма характерлик кесәлгә гириптар болғанлиқини вә саламәтликиниң начарлашқанлиқини билдүргән иди.

һазим қасим һудариниң һечқандақ җинайи әйибләш йоқ туруғлуқ қолға елинғанлиқини вә униң қилған ишиниң пәқәт «пәләстин дәвасини вә пәләстин хәлқиниң ишғалийәтчи исраилийәгә қарши елип берилған қанунлуқ күришини қоллаш» икәнликини  тәкитләп,  сәуди әрәбистан һөкүмитини һудари вә башқа қолға елинған һамас мәусллирини дәрһал қойуп беришкә чақириқ қилған иди.

һамас һудариниң 2 йилдин буйан сәуди әрәбистан билән болған мунасивәтләргә мәсул әмәлдари болуп хизмәт қилғанлиқини, һамас һәрикити ичидиму йуқири дәриҗилик вәзипиләрни өз  үстигә алған киши икәнликини  билдүрүп, чоң оғли һаниниң һечқандақ сәвәб көрситилмәстин тутуп туруливатқанлиқини әскәрткән иди.

һамас һәрикитиму һудари вә униң оғлиға тутулған бу позитсийәниң сәуди әрәбистанда турушлуқ нурғун пәләстинликләргә қарши елип бериливатқан сәпәрвәрликниң бир қисми икәнлики һәққидә агаһландурушта болған иди.