afghanistanliqlar istanbul konféransgha ümid bilen qarimaqta

türkiye awazi radiyosi xewiri: afghanistan pirézidénti eshref ghénining xewpsizlik we siyasiy ishlar meslihetchisi, shundaqla wahdeti islamiy mardumi afghanistan partiyesining rehbiri muhemmed muhaqqiq anadolu agéntliqining ziyaritini qobul qilip, türkiyening afghanistan tinchliq konféransigha sahibxanliq qilidighanliqidin memnunluq hés qilghanliqlirini bildürdi.

u türkiyening her daim afghanistan xelqini qollap kelgenlikini eskertip: «türkiye ilgirimu afghanistanda muqimliqning ornitilishi üchün zor tirishchanliqlarni körsetken bolup, ularning biri pakistan-afghanistan we türkiye üch terep yighinidur» dédi.

u türkiyening nato tarmiqida afghanistanda muqimliqning ornitilishi we qaytidin qurulushi üchün muhim ishlarni emelge ashurghanliqini eskertip, türkiyening afghanistanda qilghan paaliyetlirining semimiy we chin köngüllük ikenlikini qeyt qildi. u mundaq dédi:

«afghanistan xelqi kéler ay ötküzülüshi pilan qilinghan istanbul konféransining tinchliq bilen netijilinishini ümid qilidu. istanbul konféransida nurghun muhim mesililer muzakire qilinidu. mesililerni hel qilishmu asan emes. afghanistan xelqi türkiyening tinchliq tirishchanliqlirini qarshi alidu. türkiyening afghanistan üchün tinchliq konféransigha sahibxanliq qilishidin memnunmiz. türkiye tinchliq söhbetlirining qisqa waqit ichide netijige érishishige muhim tesir körsitishi mumkin.»

sabiq pirézidént hamid karzayimu afghanistanda tinchliqning peqet afghanistanliqlar ara kélishim tüzülgendila emelge éshish mumkinlikini bildürdi.

hamid karzayi türkiyening rusiyege oxshash, afghanistanning kona dosti ikenlikini eskertip, moskwadiki yighinda afghanistanning méhmini we közetküchisi bolghanliqini؛ istanbul konféransining bolsa, biwaste afghanistanliqlar ara muzakireler üchün ötküzülidighanliqini qeyt qildi.