yaponiye: shimaliy koréye yapon déngizigha ballistik bashqurulidighan bomba atti
yaponiye bash weziri suga yoshihidé shimaliy koréyening yapon déngizigha ikki ballistik bashqurulidighan bomba qoyup bergenlikini bildürdi.
türkiye awazi radiyosi xewiri: yaponiye bash weziri suga yoshihidé, dölet bixeterlik kéngishi (NSC) teripidin chaqirilghan jiddiy yighindin kéyin bergen bayanatida, shimaliy koréye teripidin shu jay waqti 07.04 we 07.23 de qoyul bérilgen ikki dane ballistik bashqurulidighan bombining, yaponiye déngiz teweliki we mexsus iqtisadiy rayonning sirtigha chüshkenlikini eskertish bilen bir waqitta, shimaliy koréyening birleshken döletler teshkilati xewpsizlik kéngishining, «ballistik bashqurulidighan bomba qoyup bérishini cheklesh qarari» gha xilapliq qilghanliqini qattiq eyibleydighanliqini bildürüp mundaq dédi: «bu heriket yaponiye we etrapidiki rayonlarning tinchliqi we bixeterlikige tehdit salmaqta, shimaliy koréye ballistik bashqurulidighan bomba qoyup bérish arqiliq birleshken döletler teshkilati xewpsizlik kéngishining qararini depsende qilmaqta, shimaliy koréyening bu herikitini qattiq eyibleymiz hem naraziliq bildürimiz.»
dölet bixeterlik kéngishi yighinida, hökümetning qollanghusi tedbirliri heqqide muzakire élip barghanliqlirini éytqan suga, bu heqte uchurlarni chongqurlashturush we amma bilen ortaqlishish toghruluq yolyoruq chüshürdi.
suga yighinda, déngiz we hawa qatnishining bixeterlikini qoghdashning zörürlükini tekitlep mundaq dédi: «hazir charlash paaliyetlirini keng qanat yaydurush we hoshyarliqni qattiq östürüsh ilgiriki herqandaq waqittikidinmu muhim, biz amérika qoshma ishtatliri, jenubiy koréye we bashqa döletler bilen dawamliq yéqindin hemkarliship, xelqning tinch turmushini puxta qoghdashqa kapaletlik qilimiz.»
u, shimaliy koréyege qarita qandaq siyasetlerni yolgha qoyush toghruluq, aprél éyida washingtonda bir yerge jem bolidighan amérika qoshma ishtatliri pirézidénti jo baydin bilen birlikte qarar chiqiridighanliqini éytti.
«‹kyodo› agéntliqi» ning hökümet menbelirige asaslinip xewer qilishiche, shimaliy koréye teripidin qoyup bérilgen ballistik bashqurulidighan bombidin birinchisi 420 kilométir, ikkinchisi 430 kilométir musapiliq bolup, héchqandaq bir ayropilan we paraxotqa ziyan yetküzmigen.
yaponiye diplomatiye ministirliqining bir emeldari teminligen uchurgha qarighanda, yaponiye hökümiti béyjing elchixanisi arqiliq shimaliy koréyege nota tapshurghan.
