péntagon köchmen balilargha waqitliq orun ajritishqa bashlidi

türkiye awazi radiyosi xewiri: amérika dölet mudapie ministirliqi — péntagon, téksas ishtatidiki ikki bazisida sehiye we insaniy mulazimet ministirliqigha méksika chégrasidin qanunsiz kirgen köchmen balilarni orunlashturush üchün orun ajritip bergenlikini uqturdi.

péntagon yazma bayanat élan qilip, sehiye we insaniy mulazimet ministirliqining bu heqtiki telipini qizghin qarshi alidighanliqini we ministirliqning köchmen balilarni waqitliq orunlashturush mesilisini qollaydighanliqini tekitlidi.

bayanatta körsitilishiche, péntagon téksas ishtatining st. antoniyo shehiridiki lakland bazisidiki bir yataq binasi bilen él paso shehiridiki fort bliss bazisidiki waqitliq méhmanxanida köchmen balilarning halidin xewer alidiken.

bu jaylarda qanche balining qalidighanliqi élan qilinmighan bolsimu, emma bu orunlarning yil axirighiche köchmenler üchün waqitliq turalghu qilip ajritilghanliqigha isharet qilindi.

amérika chégrasidiki qanunsiz köchmenler kirizisi barghanséri éghirlishiwatqan bolup, resmiy höjjetlerge qarighanda, amérika qanun ijra qilish tarmaqliri yanwar éyida 5600 köchmen balini, féwralda 9300, mart éyining aldinqi 20 künide 11000 köchmen balini nazaret astigha alghan.

hazirghiche 11 ming etrapida bala sehiye we insaniy mulazimet ministirliqining herqaysi mektepliride turuwatqan bolup, xewerlerge qarighanda, ministirliq 15 mingdin artuq bala üchün panahlinish orni izdimekte iken.

amérika chégrasidin ötüsh esnasida nazaret astigha élinghan balilar, aldi bilen chégra we tamozhna qoghdash darisining nazaritide, andin aile - tawabiatlirining ehwali éniq bolghuche sehiye we insaniy mulazimet ministirliqi belgiligen orunlarda turidiken.