пентагон көчмән балиларға вақитлиқ орун аҗритишқа башлиди

түркийә авази радийоси хәвири: америка дөләт мудапиә министирлиқи — пентагон, тексас иштатидики икки базисида сәһийә вә инсаний мулазимәт министирлиқиға мексика чеграсидин қанунсиз киргән көчмән балиларни орунлаштуруш үчүн орун аҗритип бәргәнликини уқтурди.

пентагон йазма байанат елан қилип, сәһийә вә инсаний мулазимәт министирлиқиниң бу һәқтики тәлипини қизғин қарши алидиғанлиқини вә министирлиқниң көчмән балиларни вақитлиқ орунлаштуруш мәсилисини қоллайдиғанлиқини тәкитлиди.

байанатта көрситилишичә, пентагон тексас иштатиниң ст. антонийо шәһиридики лакланд базисидики бир йатақ бинаси билән ел пасо шәһиридики форт блисс базисидики вақитлиқ меһманханида көчмән балиларниң һалидин хәвәр алидикән.

бу җайларда қанчә балиниң қалидиғанлиқи елан қилинмиған болсиму, әмма бу орунларниң йил ахириғичә көчмәнләр үчүн вақитлиқ туралғу қилип аҗритилғанлиқиға ишарәт қилинди.

америка чеграсидики қанунсиз көчмәнләр киризиси барғансери еғирлишиватқан болуп, рәсмий һөҗҗәтләргә қариғанда, америка қанун иҗра қилиш тармақлири йанвар ейида 5600 көчмән балини, февралда 9300, март ейиниң алдинқи 20 күнидә 11000 көчмән балини назарәт астиға алған.

һазирғичә 11 миң әтрапида бала сәһийә вә инсаний мулазимәт министирлиқиниң һәрқайси мәктәплиридә туруватқан болуп, хәвәрләргә қариғанда, министирлиқ 15 миңдин артуқ бала үчүн панаһлиниш орни издимәктә икән.

америка чеграсидин өтүш әснасида назарәт астиға елинған балилар, алди билән чегра вә таможна қоғдаш дарисиниң назаритидә, андин аилә - тавабиатлириниң әһвали ениқ болғучә сәһийә вә инсаний мулазимәт министирлиқи бәлгилигән орунларда туридикән.