дунйа сәһийә тәшкилати бай дөләтләрдин ағринди
бай дөләтләрдә әмләнгән вухән вируси (Kovid-19) ваксинасиниң сани билән кәмбәғәл дөләтләргә әвәтилгән ваксина сани оттурисидики пәрқ барғансери чоңаймақта.
түркийә авази радийоси хәвири: дунйа сәһийә тәшкилатиниң баш директори тедрос адханом ғебрейесус (Tedros Adhanom Ghebreyesus) бай дөләтләрдә әмләнгән вухән вируси ваксинаси билән кәмбәғәл дөләтләрниң ваксинаға ершишини капаләткә игә қилған «хәлқара вухән вируси ваксиналири дунйави пирограммиси» тәминлигән ваксина сани арисидики пәрқниң күндин-күнгә чоңийиватқанлиқини ейтти.
у дунйа сәһийә тәшкилатиниң җәнвәдики мәркизидә, синлиқ ахбарат елан қилиш йиғини өткүзди.
у исим бәрмәстин бәзи дөләтләрниң барлиқ нопусини әмләш үчүн бир-бири билән риқабәткә киргәнликини, әмма кирими аз дөләтләрдә ваксина әмләшниң башланмиғанлиқини билдүрди.
у җәнубий корейәниң кирими йуқири дөләт болсиму, ваксина ширкәтлири билән келишим түзмигәнликини вә «ковакс» (COVAX) ваксиналирини сақлаватқанлиқини әскәртип, җәнубий корейәни бай дөләтләргә үлгә қилип көрсәтти.
у әнглийә оксфорд универстетиниң астразенека дора ширкити билән бирликтә йасиған ваксинаниң америкадики үчинчи басқучлуқ синақта үнүминиң %79 кә йәткәнликини вә әң муһими бу ваксинаниң қан қойуқлишишни кәлтүрүп чиқармайдиғанлиқини әскәртти. у мундақ деди:
«бу мәлуматлар астразенека ваксинасиниң бихәтәр вә үнүминиң йуқири икәнликиниң йәнә бир испатидур» деди.
бу җәрйанда, дунйа сәһийә тәшкилатиниң муавин директори марийангела симав (Mariangela Simao) африқада һечқандақ дөләтниң астразенека ваксинасини рәт қилмиғанлиқини билдүрди.
у мәзкур ваксинаға мунасивәтлик әндишәләрниң ахирлашқанлиқини әскәртип: «һәммә иш нормаллашти, африқа қитәсидә астразенека ваксинасини рәт қилған һечқандақ дөләт йоқ» деди.
