җо байдин русийә пирезиденти путинниң көрүшүш тәклипини қобул қилмиди
русийә һөкүмити пирезидент владимир путинниң америка пирезиденти җо байдинға қилған синлиқ көрүшүш тәклипиниң қобул қилинмиғанлиқини елан қилди.
түркийә авази радийоси хәвири: русийә ташқи ишлар министирлиқи йазма байанат елан қилип, путинниң америка пирезиденти җо байдинға сунған синлиқ көрүшүш тәклипиниң қобул қилинмиғанлиқини билдүрди.
байанатта: «америка владимир путинниң 19-март йаки 22-мартта байдин билән йиғилип қалған икки тәрәп мунасивәтлирини вә истратегийәлик муқимлиқ мәсилилирини җәмийәткә очуқ һалда синлиқ көрүшүп музакирә қилиш тәлипини қоллимиди. русийә-америка мунасивәтлиридә, вашингтонниң хаталиқлири билән пәйда болған мәсилиләрдин қутулуш йолини тепиш үчүн йәнә бир пурсәт қолдин кәтти. буниң мәсулийити пүтүнләй америкаға тәәллуқ» дейилди.
русийә кремил сарийиниң байанатчиси дмитрий песков путин-байдин көрүшүш еһтималлиқи үстидә тохтилип: «бүгүн көрүшүш пиланлири йоқ. мениң билишимчә америка тәрәп буниңға тәййар әмәс» деди.
америка пирезиденти җо байдин 17-март (2021) путинниң «қатил» икәнликини илгири сүрүп, русийәниң америка сайламлириға қол тиққанлиқи үчүн «бәдәл төләйдиғанлиқини» билдүргән иди.
русийә пирезиденти путин буниңға қарита җо байдинға «саламәтлик» тиләп:
«башқа дөләткә, хәлққә йаки кишиләргә баһа бериш әйнәккә қарашқа охшайду. әйнәктә һәр қачан өзимизни көримиз» деди.
путин байдинға синлиқ көрүшүшни тәклип қилған иди.
