ئىسرائىلىيەدە باش مىنىستىر بېنيامىن نېتانياھۇغا قارشى نامايىشلار 37  ھەپتىدىن بېرى داۋاملاشماقتا

تۈركىيە ئاۋازى رادىيوسى خەۋىرى: ئىسرائىلىيە رەسمىي مېدىيا ئىدارىسى «Kan» نىڭ خەۋەر قىلىشىچە، تۈنۈگۈن نېتانياھۇنىڭ قۇددۇستىكى تۇرالغۇسى ئالدىغا يىغىلغان بىر قىسىم نامايىشچىلار باش مىنىستىرنىڭ قوللىغۇچىلىرىنىڭ ھۇجۇمىغا ئۇچرىغان.

تەل ئاۋىۋ ۋە قەيسارىييە شەھەرلىرىدىكى نامايىشلاردىمۇ، نېتانياھۇ ۋە ئۇنىڭ ھۆكۈمىتىنىڭ چىرىكلىكىگە قارشى «ئى نېتانياھۇ! مۇۋەپپەقىيەت قازىنالمىدىڭ، ئەمدى كېتىپ قال!» دەپ شوئارلار توۋلاندى ۋە «ئى نېتانياھۇ! سېسىق پۇراپ كەتتىڭ، تېزراق كەت!» دەپ يېزىلغان لوزىنكىلار ئېچىلدى.  

ئىسرائىلىيەدە 23 - مارتتا ئۆتكۈزۈلىدىغان چوڭ سايلامدىن ئىلگىرى باشلانغان نامايىشلار 37 ھەپتىدىن بېرى داۋاملاشماقتا.  

بەزىدە ھەپتىدە ئىككى قېتىم ئۆتكۈزۈلگەن نامايىشلاردا، نېتانياھۇغا قارىتىلغان چىرىكلىك دېلولىرى ۋە كوۋىد -19 يۇقۇمىنى كونتىرول قىلىشتا مۇۋەپپەقىيەتلىك بولماسلىقى سەۋەبىدىن ئىستىپا بېرىشى تەلەپ قىلىنماقتا.