идлибқа 282 миңдин артуқ киши қайтқан
сүрийәдә идлиб җиддийчиликни пәсәйтиш районида, түркийә билән русийә оттурисида 2020-йили 5-март имзалинип, бир күндин кейин иҗра қилинған уруш тохтитишқа бир йил болған бу күнләрдә 282 миң 544 киши өйлиригә қайтти.
түркийә авази радийоси хәвири: сүрийәдә көч мәлуматлириға мунасивәтлик хизмәтләргә мәсул сүрийә мудахилә кординаторлуқиниң мудири муһәммәд һаллаҗ идлибқа қайтқан пуқралар сани тоғрисида байанат елан қилди.
у уруш тохтитиш келишимидин кейин, бәшшар әсәд һакимийити вә униң қоллиғучилириниң һәрбий һәрикәтни тохтитиши билән, пуқраларниң өзи йашиған районларға қайтқанлиқини билдүрүп: «уруш тохтитилғандин кейинки бир йил ичидә тәхминә 56 миң 308 аилидин тәркип тапқан 282 миң 544 пуқра, идлиб вә һәләб әтрапидики туралғулириға қайтти» деди.
у өйлиригә қайтқанларниң һазирғичә иҗтимаий тәшкилатларниң йардәмлиригә көп еһтийаҗлиқ икәнликини әскәртип, пуқралар қайтқан җайларда партлимиған бомбиларға диққәт қилиши керәклики тоғрисида агаһландурди.
у уруш тохтитиш давамлашқан әһвалда техиму көп пуқраниң йуртиға қайтидиғанлиқини тәхмин қиливатқанлиқлирини билдүрүп, өйлири бәшшар әсәд һакимийити қуруқлуқтин илгириләп қолға киргүзүвалған районларда қалған пуқраларниң қайтишиниң мумкин әмәсликини қәйт қилди.
