birma herbiy soti sabiq pirézidéntni asasiy qanungha xilapliq qilish bilen eyiblidi
birmada herbiy özgirish we xelq teripidin saylanghan hökümet mesullirining tutqun qilinishigha qarshi namayish qilghanlargha xewpsizlik küchlirining rast oq étishi sewebidin alte kishi jénidin ayrildi.
türkiye awazi radiyosi xewiri: birma naw (Now) xewerler tori namayishqa qatnashqan sehiye xadimlirining melumatlirigha asasen, minglarche kishi herbiy özgirishke naraziliq bildürüsh üchün yighilghan mandalayda, xewpsizlik küchlirining rast oq we yash aqquzush bombisi étip, namayishchilarni basturghanliqini élan qildi.
birma sehiye xadimliri namayishchilargha qaritip oq chiqirilishi netijiside alte kishining jénidin ayrilghanliqini, onlarche kishining yarilanghanliqini we bezi yarilanghanlarning ehwalining xeterlik ikenlikini bildürdi.
namayishchi guruppilar ölüm sanining éshishidin endishe qiliwatqanliqlirini eskertti.
jénidin ayrilghanlar arisidiki 19 yashliq namayishchi qizning taratqularda tarqitilghan fotografliri naraziliqlarning qozghilishigha seweb boldi. namayishchilarning taratqularda tarqatqan widéolirida, xewpsizlik küchlirining bezi jesetlerni herbiy aptomobillargha toshuwatqanliqi körünidu.
yangon shehiridiki meydanlargha toplanghan nurghun namayishchi, xewpsizlik küchlirining muwazinetsiz küch ishlitishini eyiblep, tutqun qilinghan xelq teripidin saylanghan hökümet ezalirining qoyup bérilishini telep qildi.
birma herbiy soti 2021-yili 1-féwral etigende tutqun qilinghan sabiq pirézidént win myint (Win Myint) ni ikki ayrim «asasiy qanungha xilapliq qilish» jinayiti bilen eyiblidi. eger bu jinayetler testiqlansa win myintning üch yilghiche qamaq jazasigha höküm qilinishining mumkinliki qeyt qilindi.
