birma armiyesi namayishchilargha qarshi rast oq ishletti
birma xewpsizlik küchliri herbiy özgirish we xelq teripidin saylanghan hökümet ezalirining qolgha élinishigha qarshi namayish qiliwatqanlargha rast oq we awaz bombisi étip tarqitiwétishke urundi.
türkiye awazi radiyosi xewiri: birma namayishchiliri ijtimaiy taratqu adréslirida, bügün (2021-yili 2-mart) ki namayishlarda, rast oq bilen yarilanghan kishilerning widéo körünüshlirini hembehirlidi.
taratqularda hembehirlengen uchurlarda, xewpsizlik küchliri atqan awaz bombilirining körünüshlirimu tarqitildi.
xewpsizlik küchliri lashiyo (Lashio) shehiridiki bir chérkawgha bésip kirip, 10 kishini tutqun qildi.
irma siyasiy mehbuslirigha yardem qilish teshkilatining bayanatida, 1-féwral (2021) herbiy özgirishige qarshi namayishlar bashlanghandin tartip bügüngiche 30 kishining xewpsizlik küchlirining basturushida jénidin ayrilghanliqi, 1213 kishining tutqun qilinghanliqi we bulardin 913 kishining hazirghiche tutqunda ikenliki bildürüldi.
birma armiyesi özige yéqin siyasiy guruppilarning 2020-yili 8-noyabir ötküzülgen saylamda saxtipezlik qilinghanliqini ilgiri sürüshi we dölette siyasiy ixtilaplarning küchiyishi bilen, 2021-yili 1-féwral hakimiyetni ötküzüwalghan idi.
birma armiyesi yene, tashqi ishlar ministiri we döletning emeliyettiki rehbiri ang san suchi qatarliq hökümet emeldarlirini hemde hakimiyet béshidiki partiye mesullirini tutqun qilip, bir yilliq jiddiy halet élan qilghan idi.
