bérmadiki herbiy hakimiyet namayishchilargha tehdit saldi

türkiye awazi radiyosi xewiri: sherqiy jenubiy asiya döliti bérmada 1 féwraldiki herbiy siyasiy özgirishke narazliq bildürüwatqan namayishchilar omumiyüzlük ish tashlash chaqiriqi qildi. herbiy hakimiyet bolsa,  «namayishchilargha qarshi ejellik küch ishliteleydighanliqi» heqqide agahlandurushta boldi.

namayishchilarni teshkilligen ammiwiy itaetsizlik herikiti 22 - féwralda dölet miqyasida kochilargha chiqish we «bahar inqilabi» ni bashlash chaqiriqida boldi.

herbiyler qurup chiqqan dölet hakimiyiti kéngishi, dölet téléwiziye qanili «MRTV» da élan qilghan bayanatida, «namayishchilarning topilang we hökümetsizlik chaqiriqini 22 - féwralgha merkezleshtürgenliki körülmekte. namayishchilar ammini, bolupmu héssiyatchan yash - ösmürlerni hayatliridin ayrilip qalidighan bir jédelge sörimekte» dégen sözlerni ishletti.

bérma armiyesi özlirige yéqin siyasiy guruppilarning  2020-yili 8-noyabirdiki saylamlarda hile ishlitilgenlikini ilgiri sürüshi bilen dölette jiddiylik kücheygendin kéyin 1 - féwralda hakimiyetni tartiwalghan idi.

armiye tashqi ishlar ministiri shundaqla döletning emeliy rehbiri angsan su chi qatarliq nurghun mesullar bilen hakimiyet béshidiki partiye rehberlirini nazaretke élip, bir yilliq jiddiy halet élan qilghan idi.

namayishchilar bügünge qeder tinch namayish dairiside zorawanliqqa qarshi pozitsiye tutup kelgen bolup, 3 namayishchi bixeterlik qisimliri teripidin étip öltürülgen idi.