yawropa ittipaqi bilen nato amérikani rusiye we xitaygha qarshi birlikte heriket qilishqa chaqirdi

türkiye awazi radiyosi xewiri: shimaliy atlantik ehdi teshkilati bash katipi stolténbérg, yawropa ittipaqi kéngishining bashliqi charléz mishél  we yawropa ittipaqi komitétining bashliqi ursula won dér léyén, widéo konférans wasitisi arqiliq chaqirilghan «miyunxén bixeterlik konféransi» da söz qildi.

stolténbérg, amérika qoshma ishtatliri pirézidénti jo baydin we shimaliy atlantik ehdi teshkilatigha eza döletlerning rehberliri bilen bu yil biryussélda bashliqlar yighini chaqirish we «yéngi transatlantik küntertip» békitishni töt köz bilen kütüwatqanliqlirini eskertish bilen bir waqitta, yéqinqi yillarda yawropa bilen amérika qoshma ishtatliri otturisida bezi pikir oxshimasliqlirining körülgenlikini tekitlep mundaq dédi: «emdi téximu küchlük bir ittipaqdashliq munasiwiti ornitish üchün, qaytidin ishench hasil qilish we hemkarliqimizni kücheytishte aldimizda tarixiy purset bardur.»

u, yawropa bilen shimaliy amérikaning aldida zor xirislarning barliqini, bularni xitayning qed kötürüshi, ilghar tor hujumliri, weyran qilish xaraktérlik téxnologiyeler, kilimat özgirishi, rusiyening muqimsizliq heriketliri we  térrorluq paaliyetliri teriqiside tilgha élip, «héchqandaq bir dölet héchqandaq bir qitede bu xirislargha qarshi öz aldighila küresh qilalmaydu» dédi.

yawropa bilen shimaliy amérikaning hakimmutleq küchler teripidin tehdit séliniwatqan pirinsipliq xelqaraiq tertipni qoghdishi kéreklikini tekitligen stolténbérg, mundaq dep körsetti: ««xitay bilen rusiye öz menpeeti üchün seper pirinsipini qayta yézishqa urunuwatidu. xitayning qed kötürüshi, bixeterlik, parawanliq we turmush usulimizgha élip kelgüsi netijiler jehettin transatlantik  jemiyetlirimiz üchün nahayiti muhim bir mesile. shu wejidin, shimaliy atlantik ehdi teshkilati, awstraliye we yaponiye qatarliq yéqin hemrahliri bilen munasiwetlirini mustehkemlishi we dunya miqyasida yéngi ittipaqdashliq munasiwetlirini ornitishi kérek.»

yawropa ittipaqi kéngishining bashliqi charléz mishél bolsa, yawropa ittipaqi bilen amérika qoshma ishtatlirining qimmet ölchemliri, parawanliq we tesir küchini qoghdash hem kücheytish üchün tirishchanliq körsitishining zörürlükini tekitlesh bilen bir waqitta, bolupmu «kowid – 19» yuqumigha qarshi küresh, soda, digital tereqqiyat, muhit siyasitige ötüsh we adil baj élish qatarliq mesililerning muhimliqigha isharet qildi, hemde yawropa ittipaqining amérika qoshma ishtatliri bilen küchlük hem ishenchilik shériklik munasiwiti ornitishni ümid qilidighanliqini eskertip mundaq dédi: «kélinglar, shérikchilikimizni téximu güzel bir dunyaning küch merkizige aylandurayli, tekrar amérikani qarshi alimiz.»

yawropa ittipaqi komitétining bashliqi ursula won dér léyén bolsa, «kowid – 19» yuqumi basquchidin kéyin yer shari xaraktérlik küntertipni kilimat özgirishining belgileydighanliqini tekitlep mundaq dédi: «kilimat özgirishige qarshi küreshte muweppeqiyetke érishelishimiz üchün bashqa döletlergimu éhtiyajimiz bar.»

u, amérika qoshma ishtatlirini yawropa ittipaqi bilen digital iqtisad mesiliside qanun - belgilime tüzüshke chaqirip mundaq dédi: «xitay ‹kowid – 19› yuqumigha qarimay, 2020 – yili körünerlik tereqqiy qildi, rusiye bolsa, dölet ichi - sirtida qanun – belgilimilerni depsende qilishni dawamlashturdi, shunga, yawropa ittipaqi bilen amérika qoshma ishtatliri ittipaqdash we ishenchilik shériklerdin bolush süpiti bilen hemkarliqni yenimu kücheytishshi shert.»