nato afghanistandin chékinish mesiliside qarar chiqiralmidi

türkiye awazi radiyosi xewiri: nato bash katipi stolténbérg sin yighini sheklide échilghan we türkiyege wakaliten dölet mudapie ministiri hulusi akar qatnashqan nato dölet mudapie ministirliri yighinining ikkinchi we axirqi kün yighinidin kéyin, muxbirlarni kütüwaldi.

u yighinda afghanistan bilen iraqtiki nato qisimliri toghrsida pikir almashturghanliqlirini bildürüp, amérika bilen taliban otturisidiki kélishim boyiche, 2021-yili 1-mayda afghanistandiki xelqaraliq qisimlarning chékinishi mesiliside qarar chiqiralmighanliqlirini qeyt qildi.

u afghanistandiki tinchliq musapisi asta ilgirilewatqan bolsimu, emma qollawatqanliqlirini eskertti we iraq toghrisida mundaq dédi:

«iraq qisimlirini térrorluqqa qarshi turushida qollash we daéshning ikkinchi qétim peyda bolushining aldini élish meqsitide, nato qisimlirini kéngeytishni qarar qilduq. qismimiz 500 kishidin 4 minggha chiqirilidu. telim-terbiye ishlirigha, iraq organliri bilen baghdad sirtidiki rayonlarni köpirek qatnashturimiz» dédi.

u natoning iraq hökümitining telipi bilen iraqta turuwatqanliqini tekitlep: «bu xizmetler iraqning igilik hoquqi we zémin pütünlükige hörmet qilish pirinsipi boyiche qiliniwatidu» dédi.

u yene, iraqtiki nato qisimlirigha rehberlik qilish wezipisining kanadadin daniyege ötküzüp bérilidighanliqini bildürdi.