xitay pilanliq tughutni pütünley emeldin qaldurushqa teyyarlandi
xitay hökümiti töwenlewatqan tughut nisbitini östürüsh üchün bezi ölkilerde pilanliq tughut we perzent körüshke qoyulghan cheklimige munasiwetlik siyasetni emeldin qaldurushqa teyyarlanmaqta.
türkiye awazi radiyosi xewiri: xitay döletlik sehiye komitéti pilanliq tughut toghrisida bayanat élan qildi.
bayanatta, döletning kona sanaet rayoni bolghan sherqiy shimaldiki xéylongjyang, jilin we lyawning ölkiliride pilanliq tughut siyasitini emeldin qaldurushning iqtisad, ijtimaiy muqimliq we asasiy jamaet xizmetlirige körsitidighan tesirini tekshürüsh üchün tetqiqat élip bérilishi mumkinliki qeyt qilindi.
yuqiridiki ölkilerdiki yash nopusning bashqa sheherlerge ishlesh üchün kétidighanliqi we buning rayondiki iqtisadiy sistéma, sanaet qurulmisi we ijtimaiy siyasetlerge tesir körsitidighanliqi eskertilgen bayanatta, pilanliq tughut siyasiti özgergen ehwalda nopusning köpiyishi we bu élip kélidighan ijtimaiy xeterlerning analiz qilinishi kérekliki qeyt qilindi.
xéylongjyang, jilin we lyawning ölkiliride élip bérilidighan tetqiqatning, nopus siyasitining pütünley emeldin qaldurulushi mesiliside «sinaq pirogramma» bolup qélishi perez qilinmaqta. 2015-yili xitayda yolgha qoyulghan «bir perzentlik bolush» siyasiti emeldin qaldurulup, «ikki perzentlik bolush» siyasiti yolgha qoyulghan bolsimu, yéngi tughulghan bowaq sanining köpiyishige tesir körsitelmigen. yéqinqi besh yildin buyan tughut nisbiti izchil töwenligen.
pilanliq tughut siyasiti xitayda téz köpiyiwatqan nopusni kontrol qilish üchün 1970-yillarda qedemmu qedem yolgha qoyulghan bolup, sheherlerdiki aililerge bir perzentlik bolush siyasiti ijra qilinghan idi. yéza nopusidikilerge bolsa, birinchi perzenti qiz bolghan ehwalda ikkinchi perzenti bolushqa ruxset qilinghan idi.
xitay siyasiy biyurosining 2017-yilidiki doklatigha asaslanghanda, dölet nopusining töttin birining otturiche yéshi 2030-yiligha barghiche 60 yash we uningdin yuqiri bolidiken.
