дубәй мәликиси латифәниң бир видеоси ашкариланди
2018-йили дөлитидин қачмақчи болғанда тутулуп қалған дубәй әмириниң қизи мәликә латифәниң достлириға мәхпий әвәткән бир видео ашкариланди. видеода мәликә латифә дадисини «өзини гөрүдә тутуш» билән әйибләйду.
түркийә авази радийоси хәвири: дубәй әмири бин рашид әл мәхтумниң қизи мәликә латифә дөлитидин қечип кәтмәкчи болған, әмма тутулуп қалған иди.
мәликә латифә дубәйгә мәҗбурий елип кетилиштин бурун достлириға видео әвәтип, бешидин өткәнлирини байан қилған иди.
мунчида йанфон билән тартилған видеода, мәликә латифә дадисини өзини «гөрүдә тутуш» билән әйибләйду.
у: «деризиси вә ишиклири қулупланған бир дачида гөрүдә тутуп турулуватимән. сиртта бәш, ичидә икки сақчи бар. мән һәр қандақ шәкилдә һавалиниш үчүн сиртқа чиқалмаймән» деди.
мәликә латифә қачан әркинликкә чиқидиғанлиқини билмәйдиғанлиқини вә җан бихәтәрликидин әндишә қиливатқанлиқини билдүрди.
у қандақ тутуп келингәнликиниму байан қилип, қачқан қолваққа тутушқа кәлгән әскәрләргә қаршилиқ көрсәткәнликини, пәшва атқанлиқини, һәтта бир әскәрниң қолини чишливалғанлиқини әскәртти.
мәликә латифәниң видеоси достлири вә бир кишилик һоқуқ адвокати тәрипидин б б с ға берилди.
мәликә латифә 2018-йили бир фирансузниң йардими билән дубәйдин қолвақ билән қечип һиндистан деңиз тәвәликигә кәлгәндә тутулуп қалған вә қайтуруп кетилгән иди.
дунйадики нурғун кишилик һоқуқ қоғдиғучиси мәликә халимисиму дубәйгә елип кетилгәнликини, шуңа буниң «елип қечиш» икәнликини илгири сүрүп, «латифәни қойуп бәр» намида сәпәрвәрлик һәрикити башлиған иди.
