йавропа иттипақи билән астра зенека келишәлмиди

йавропа иттипақи рәһбәрлири билән астра зенека дора ширкитиниң вәкиллири вухән вируси (Kovid-19) ға қарши тәтқиқ қилип йасалған ваксина билән тәминләш ишлирида көрүлгән ихтилапларни һәл қилиш тоғрисида көрүшти, әмма илгириләш һасил қилиналмиди.

1572812
йавропа иттипақи билән астра зенека келишәлмиди

түркийә авази радийоси хәвири: йавропа иттипақи комитетиниң сәһийә ишлириға мәсул әзаси стелла кйрийакидес (Stella Kyriakides) твиттерда, астра зенека ширкитиниң йуқири дәриҗилик әмәлдари паскал сорийот (Pascal Soriot) билән мушу һәптә ичидә тәстиқлиниши күтүлүватқан ваксинани тәминләш мәсилисини музакирә қилғанлиқлирини уқтурди.

у музакирәниң «иҗабий муһит ичидә» өткәнликини билдүрүп, ширкәтниң келишимгә бойсунуши керәкликини йәнә бир қетим тәкитлиди.

у: «тапшуруш ишлирида оттуриға чиқиватқан ениқсизлиқлардин биарам болуватимиз. астра зенекадин йилниң тунҗи чарики үчүн топланған ваксиналарни тез сүрәттә тапшуруши үчүн ениқ пилан тәләп қилимиз. ваксиналарни йавропа иттипақи пуқралириға тез йәткүзүш үчүн ширкәт билән чариләр үстидә давамлиқ бирликтә издинимиз» деди.

астра зенека йилниң тунҗи чарикидә йавропа иттипақини ваксина билән тәминләшни %60 азайтидиғанлиқини елан қилғандин кейин, тәрәпләр оттурисида ихтилап чиққан иди.

йавропа иттипақи йаз айлирида ширкәтниң400 милйон шишә ваксина билән тәминләш тоғрисида түзүлгән келишимгә бойсунушни тәләп қилмақта. астра зенека мәсуллири болса, келишимдә тәминләш тоғрисида «әң йуқири сәвийәдә тиришчанлиқ көрситиш» кә мунасивәтлик бир маддиниң барлиқини, әмма буниң өзлирини ениқ тәминләш вақтиға бойсунушни билдүрмәйдиғанлиқини илгири сүрмәктә.

астра зенеканиң ваксина билән тәминләштә кечикишигә, белгийәдики фабрикада чиққан мәсилиләрниң сәвәб болғанлиқи қәйт қилинди.

бийонтек (BioNTech) билән тәтқиқ қилип йасалған ваксинани белгийәдики фабрикада ишләпчиқарған файзер (Pfizer), өткән һәптә қисқартқан тәминләш сәвийәсини нормал сәвийәгә кәлтүргәнликини елан қилди.



مۇناسىۋەتلىك خەۋەرلەر