béyjing: xitay - amérika armiyeliri munasiwiti yéngi tarixiy bashlinish nuqtisida turmaqta

türkiye awazi radiyosi xewiri: xitay dölet mudapie ministirliqi bayanatchisi polkownik wu chyen muxbirlargha ayliq doklat bérish yighinida söz qilip, ikki dölet armiyesi otturisidiki munasiwet amérikaning sabiq pirézidénti donald tramp dewride «nurghun xeter we xiris»largha duch kelgenlikini, emma nöwette munasiwetlerni eslige keltürüsh pursiti barliqini éytti.

wu chyen, tereplerning seyshenbe we charshenbe künliri téléfon yighini ötküzüp, asiyadiki toqunushlarda yoqap ketkenler bilen amérika urush esirlirining iz- dérikini qilish toghrisida söhbetleshkenlikini bildürüp: «endishe qiliniwatqan mesililer we ikki armiyening hemkarliqi toghrisida chongqur pikir almashturulghanliqini, xitayning insaniy sahede amérikaning endishilirige ehmiyet béridighanliqini eks ettürgenliki»ni tilgha élip ötti.

wu chyen, ikki dölet armiyesining hemkarliqqa ehmiyet bérip, toqunushtin saqlinishi kéreklikini tekitlep: «hazir xitay - amérika armiyeliri munasiwiti yéngi tarixiy bashlinish nuqtisida turmaqta» dédi.

u, amérikaningmu armiyeler ara munasiwetlerde alaqini kücheytish, xeterni kontrol qilish, kirizistin saqlinish we munasiwetni ilgiri sürüshte xitayning endishisini nezerge élip muwapiq heriket qilishini ümid qilidighanliqini sözlirige ilawe qildi.

amérikaning yéngi tashqi ishlar ministiri antoniy bilinkén bolsa, filippinliq mensepdishi téodoro loksin bilen téléfonda körüshkende, xitayning jenubiy xitay déngizdiki dewalirini ret qilidighanliqini tekitlep, béyjing hökümitining bésimigha qarshi sherqiy jenubiy asiya döletliri bilen ittipaqlishidighanliqini otturigha qoyghanidi.