baydin hökümiti trampning qoral sétish toxtamlirini toxtatti
amérika tashqi ishlar ministirliqi aldinqi hökümet bashlighan herbiy qoral-yaragh sétishlirini toxtatti.
türkiye awazi radiyosi xewiri: amérika tashqi ishlar ministirliqining bir mesul emeldari: «ministirliq yéngi hökümetke tekshürüsh pursiti yaritip bérish üchün, chet ellerge qoral sétishlar we biwaste soda sétishliri dairiside saqlawatqan bezi herbiy téxnika ötküzüp bérish we sétishlarni waqitliq toxtatti» dédi.
bu ehwalning pirézidént almashqanda normal hadise ikenlikini bildürgen mesul emeldar yene: «hökümetning ochuq-ashkariliq, yaxshi bashqurush we amérika qoral sétishlirining qabiliyetlik, ortaq xizmet qilalaydighan we téximu küchlük shériklik munasiwetliri berpa qilishta istratégiyelik nishanlirimizgha uyghun bolushi kérekliki mesiliside sadiq ikenlikini körsitip béridu» dédi.
mezkur mesul emeldar, buning barliq qoral-yaragh sétishlirini öz ichige almaydighanliqini, emma yéqinqi waqitta ereb birleshme xelipilikige sétish ruxsiti bérilgen «F-35» we bashqa qoral sistémiliri bilen seudi erebistangha oxshash nurghun döletlerge qarita testiqlanghan qoral-yaragh sétishlarni öz ichige alidighanliqini eskertti.
sabiq pirézidént donald tramp hökümiti wezipisidin ayrilishtin burun, ereb birleshme xelipilikige isirailiye bilen tüzgen munasiwetlirini normallashturush kélishimining bedilige «F-35» ayropilani sétip bérishni testiqlash toghrisida wede bergen idi.
