американиң ички бихәтәрлик мувәққәт министири вәзиписидин истипа бәргәнликини елан қилди

түркийә авази радийоси хәвири: америкада 6 - йанвардики дөләт мәҗлиси бинасиға бесип кириш вәқәсидин кейин ақсарай вә трамп кабинетидин истипа беришләр давамлашмақта.

америка ички бихәтәрлик министирлиқи вәзиписини вакалитән өтәп келиватқан чад волф йазма байанатида, йерим кечидин башлап күчкә игә болидиған шәкилдә вәзиписидин истипа бәргәнликини елан қилди.

нормал шараитта вәзиписини җо байден вәзипигә олтуридиған 20 - йанварғичә давамлаштурушни пиланлиғанлиқини билдүргән волф, йеқинқи вәқәләр сәвәбидин хизмитидин айрилишни қарар қилғанлиқини билдүрди.

волф өзниң орниға федератсийә җиддий ишларни башқуруш оргининиң башлиқи пете гайнорниң мувәққәт министирлиқ вәзиписини өтәйдиғанлиқини уқтурди.

америкида алдинқи һәптә йүз бәргән дөләт мәҗлиси бинасиға бесип кириш вәқәсидин кейин қатнаш министири елиин чав вә маарип министири бетсий девосму вәзиписидин истипа бәргән иди.

волф 7 - йанвар әтигәндә йазма байанат елан қилип, дөләт мәҗлиси бинасиға бесип кириш вәқәсини әйиблигән иди.

бу байанаттин бир нәччә саәт кейин ақсарай тәрипидин елан қилинған йазма байанатта, трампниң волфни 3 - йанварда ички бихәтәрлик министири болушқа намзат көрсәткәнлики, бирақ бу намзатлиқ тәклипиниң йәнә трамп тәрипидин қайтурувелинғанлиқи билдүрүлгән иди.