trampning béshi dertte

türkiye awazi radiyosi xewiri: amérika awam palatasining bashliqi nensiy pélosi démokratlargha mektup ewetip, 6-yanwar (2021) yüz bergen kongrege bésip kirish weqesige jawabkar dep qaralghan donald trampni hoquqidin élip tashlashqa munasiwetlik qanun basquchi jeryanlirini chüshendürdi.

u asasiy qanunning qoshumche 25-maddisi boyiche muawin pirézidént mayk pénsning pirézidént donald trampni wezipisidin qaldurush musapisini bashlishi üchün, düshenbe küni (bügün, 2021-yili 11-yanwar) palatada bir qanun layihesini küntertipke qoyidighanliqlirini qeyt qildi.

u aldi bilen, qanun layihesining awaz birliki bilen qobul qilnip-qilinmaydighanliqigha qaraydighanliqlirini؛ eger awaz birliki emelge ashmisa, seyshenbe (2021-yili 12-yanwar) küni awam palatasining omumiy kéngishide awazgha qoyup qobul qilidighanliqlirini bildürdi.

u muawin pirézidént mayk pénsqa pirézidént trampni wezipisidin qaldurush ishliri üchün 24 saet bérilidighanliqini eskertip, bu waqittin kéyin, pirézidént trampni hoquqidin élip tashlash musapisining palatada bashlinidighanliqini qeyt qildi.

nensiy pélusining mektubida, pirézidént trampni hoquqidin élip tashlashqa munasiwetlik ötküzülidighan awaz tashlashning qachan élip bérilidighanliqi toghrisida tepsiliy melumat bérilmidi. emma, mezkur awaz tashlashning 20-yanwar (2021) ötküzülidighan qesem bérip wezipe tapshuruwélish murasimidin burun bolidighanliqi jezmleshmekte.

amérika qanunlirigha asaslanghanda, awam palatasi bezi qanungha xilap qilmishlar sewebidin bashlanghan pirézidéntni hoquqidin élip tashlash musapiside pirézidéntni eyibleydighan teptish mehkimisi bolush rolini oynaydu. kéngesh palatasi bolsa, pirézidéntning qanungha xilapliq qilghan yaki qilmighanliqigha qarar béridighan zastatillar rolini oynaydu.

2019-yili 18-dékabir awam palatasi omumiy kéngishide élip bérilghan trampni eyibleshte, pirézidént tramp«hoquqidin qalaymiqan paydilinish» we «kongrening funksiyesige tosqunluq qilish» bilen eyiblengen idi. tramp 2020-yili 6-féwral kéngesh palatasidiki awaz bérishte bu eyibleshlerdin aqlanghan idi.

bu jeryanda, amérika edliye ministirliqi kongrege bésip kirishke munasiwetlik yene ikki kishining eyiblengenlikini jakarlidi. buning bilen, ichki qisimda kongrege bésip kirishke munasiwetlik 25 térrorizm tekshürüshi bashlanghan boldi.