aqsaray dölet mejlisige bésip kirish teshebbusini eyiblidi
amérika qoshma ishtatliri aqsaray bayanatchisi kaylég makéni aldinqi küni dölet mejlisige bésip kirish teshebbusini qattiq eyibleydighanliqlirini bildürdi.
türkiye awazi radiyosi xewiri: makéni, tramp terepdarlirining amérika dölet mejlisige bésip kirish teshebbusidin kéyin, tünügün aqsarayda élan qilghan bayanatida, aqsaray namidin bayanat bériwatqanliqini tekitlep mundaq dédi: «millitimizning dölet mejliside körgenlirimiz nomussizliq we amérikaning qimmet qarishigha zit bolup, biz bu qilmishlarni hökümitimiz namidin qattiq eyibleymiz, qanunsiz heriket qilghanlar sotlinishi kérek.»
namayish qilish hoquqining asasiy qanunning 1-qoshumche maddisi teripidin qoghdilidighanliqini eskertken makéni, mundaq dep körsetti: «washingtonda we dölet miqyasida körgenlirimiz, bu hoquqni ishlitish emes idi, charshenbe küni dölitimizning mejlisining karidorlirida sadir bolghan qilmishlarmu bu hoquqning ishlitilishi emes idi.»
weqelerde adem ölüsh we yarilinish ehwali körülgenlikidin tolimu epsuslinidighanliqlirini qeyt qilghan makéni, dölet xewpsizlik küchlirini «qehrimanlar» dep atap, mundaq dédi: «dölet mejlisi binamizni zorawanliq heriketliri bilen ishghal qilghanlar, amérika hakimiyitining barliq qimmet ölchemlirige qarshidur, aqsaraydiki hemme kishi, hökümetning wezipisini pirinsip boyiche ötküzüp bérishini ishqa ashurush üchün xizmet ishlimekte. hazir amérika üchün bir yerge jem bolush we zorawanliqni ret qilishning del waqtidur.»
aldinqi küni, aqsarayning aldida, trampmu ishtirak qilghan yighilishtin kéyin, dölet mejlisi binasigha qarap mangghan tramp terepdari namayishchilar bilen saqchilar otturisida toqunush yüz bergenidi.
saqchilarning tosuqliridin halqighan bir qisim namayishchilar dölet mejlisi binasigha kirgenidi.
weqeler jeryanida 4 kishi hayatidin ayrilghan, köp sanda kishi yarilanghanidi.
