amérika dölet mejlisige basturup kirish weqeliride töt adem qaza qildi

türkiye awazi radiyosi xewiri: pirézidént donald tramp qollighuchilirining amérika paytexti washingtondiki dölet mejlisi binasigha bésip kirishidin kéyin yüz bergen weqelerde töt adem qaza qildi, kem dégende 52 adem nazaret astigha élindi.

paytext washingtondiki weqelerdin kéyin dölet miqyasida 15 künlük jiddiy halet élan qilindi؛ amérika taratquliri, jiddiy haletning 21- yanwarghiche dawamlishidighanliqini bildürdi.

washingtonda shu yer waqti (tünügün) saet 18:00 din bashlap kochigha chiqish cheklimisi élan qilindi.

paytextte namayish ötküzgen tramp qollighuchilirining bir qismi saqchilarning tosaqlirini bösüp ötüp, dölet mejlisi binasigha kirdi؛ saqchilar binagha kirgen namayishchilargha yash aqquzush bombisi ishlitip mudaxile qildi. binadiki sürkilishte yarilanghan bir ayal qaza qildi.

washington saqchi idarisi bayanat élan qilip, dölet mejlisi binasidiki sürkilish esnasida yarilanghan ayalning doxturxanida dawalash ünüm  bermey qaza qilghanliqini uqturdi. emma, qaza qilghan ayalning kimlikige dair uchurlar ortaqlishilmidi.

washington saqchi bashliqi robért konti weqelerde yene üch kishining qaza qilghanliqini bildürdi.

hayatidin ayrilghanlarning  birining er, ikkisining ayal ayal ikenlikini we bu kishilerning doxturxanilardiki jiddiy qutquzush bölümliride qaza qilghanliqini tilgha alghan saqchi bashliqi robért kontimu qaza qilghan kishilerning kimlikini ashkarilimidi.

u yene, bu weqede 14 saqchining yénik yarilanghanliqini, kem dégende 52 kishining nazaret astigha élinghanliqini bildürdi.

xewpsizlik küchliri, dölet mejlisi binasigha yéqin jaydin tépilghan partlatquch maddining chuwup tashlanghanliqini uqturdi.

bu özgirishlerdin kéyin dölet mejlisidiki jow baydinning pirézidént bolup saylinishini maqullash yighini waqitliq toxtitildi we  yighingha riyasetchilik qilghan muawin pirézidént mayk péns binaning sirtigha chiqirildi.

péns binadin chiqip uzun ötmeyla bayanat bérip: «(namayishchilarni) dölet mejlisi binasidiki weqelerge xatime bérish»ke chaqirip, zorawanliqqa yol qoymaydighanliqini eskertti.

arqidin kéngesh palata ezalirimu dölet mejlisi binasidin tarqaqlashturuldi.

yéngidin saylanghan pirézidént jo baydin muxbirlarni kütüwélish yighini ötküzüp: «amérika démokratiyesi we qanun bilen idare qilish» qa qaritilghan hujumlarni toxtitishqa chaqirdi.

baydin trampqa xitab qilip: «u choqum kaméralarning aldigha chiqip, (dölet mejlisi binasidiki) qorshawgha xatime bérishi kérek» dédi.

pénsilwaniye ishtati bashliqi tom wolf tiwittér arqiliq élan qilghan bayanatida, namayishchilarning paytext washingtondiki dölet mejlisi binasigha kirishige «siyasiy özgirish» dep baha berdi.

bu özgirishlerdin kéyin tramp dölet muhapizetchilirining «dölet mejlisi binasidiki weqelerge arilishishi» toghrisida yolyoruq chüshürdi.

niyuyork waliysi andréw kuomo özining tiwittér adrési arqiliq bayanat élan qilip: «men amérika dölet muhapizetchilirining telipige binaen niyuyorktin 1000 muhapizetchini paytext washingitongha ikki hepte wezipe ötesh üchün orunlashturuwatimen» dégenlerni qeyt qildi.

donald tramp ijtimaiy alaqe torida uchur hembehrilep namayishchilarni «tinchliqni saqlashqa» chaqirdi.

jiddiylik küchiyip ketkendin kéyin, donald tramp sin körünüshlük uchur hembehrilep: «ular bizdin saylamni oghrilidi, emma hazir siler choqum öyünglerge qaytishinglar kérek» dédi.

pirézidént tramp weqeler bashlinishtin ilgiri bergen bayanatida bolsa, özining pirézidént saylimidiki meghlubiyitini qobul qilmaydighanliqini we küreshni toxtatmaydighanliqini bildürgenidi.

tramp, 3 – noyabirdiki pirézidéntliq saylimining netijisini awazgha qoyush meqsitide uyushturulghan dölet mejlisi yighinigha naraziliq bildürüsh üchün washingtongha toplanghan qollighuchilirigha oq ötmes eynekning arqisida turup xitab qilip: «démokratchilar partiyesining saylamda qaidige xilapliq qilghanliqi» toghrisidiki eyiblishini tekrarlighanidi.

tramp özining saylamning heqiqiy ghelibe qilghuchisi ikenlikini ilgiri sürüp: «men meghlubiyetni hergiz étirap qilmaymen, waz kechmeymen» dégenidi.