америка дөләт мәҗлисигә бастуруп кириш вәқәлиридә төт адәм қаза қилди

түркийә авази радийоси хәвири: пирезидент доналд трамп қоллиғучилириниң америка пайтәхти вашингтондики дөләт мәҗлиси бинасиға бесип киришидин кейин йүз бәргән вәқәләрдә төт адәм қаза қилди, кәм дегәндә 52 адәм назарәт астиға елинди.

пайтәхт вашингтондики вәқәләрдин кейин дөләт миқйасида 15 күнлүк җиддий һаләт елан қилинди؛ америка таратқулири, җиддий һаләтниң 21- йанварғичә давамлишидиғанлиқини билдүрди.

вашингтонда шу йәр вақти (түнүгүн) саәт 18:00 дин башлап кочиға чиқиш чәклимиси елан қилинди.

пайтәхттә намайиш өткүзгән трамп қоллиғучилириниң бир қисми сақчиларниң тосақлирини бөсүп өтүп, дөләт мәҗлиси бинасиға кирди؛ сақчилар бинаға киргән намайишчиларға йаш аққузуш бомбиси ишлитип мудахилә қилди. бинадики сүркилиштә йариланған бир айал қаза қилди.

вашингтон сақчи идариси байанат елан қилип, дөләт мәҗлиси бинасидики сүркилиш әснасида йариланған айалниң дохтурханида давалаш үнүм  бәрмәй қаза қилғанлиқини уқтурди. әмма, қаза қилған айалниң кимликигә даир учурлар ортақлишилмиди.

вашингтон сақчи башлиқи роберт конти вәқәләрдә йәнә үч кишиниң қаза қилғанлиқини билдүрди.

һайатидин айрилғанларниң  бириниң әр, иккисиниң айал айал икәнликини вә бу кишиләрниң дохтурханилардики җиддий қутқузуш бөлүмлиридә қаза қилғанлиқини тилға алған сақчи башлиқи роберт контиму қаза қилған кишиләрниң кимликини ашкарилимиди.

у йәнә, бу вәқәдә 14 сақчиниң йеник йариланғанлиқини, кәм дегәндә 52 кишиниң назарәт астиға елинғанлиқини билдүрди.

хәвпсизлик күчлири, дөләт мәҗлиси бинасиға йеқин җайдин тепилған партлатқуч маддиниң чувуп ташланғанлиқини уқтурди.

бу өзгиришләрдин кейин дөләт мәҗлисидики җов байдинниң пирезидент болуп сайлинишини мақуллаш йиғини вақитлиқ тохтитилди вә  йиғинға рийасәтчилик қилған муавин пирезидент майк пенс бинаниң сиртиға чиқирилди.

пенс бинадин чиқип узун өтмәйла байанат берип: «(намайишчиларни) дөләт мәҗлиси бинасидики вәқәләргә хатимә бериш»кә чақирип, зораванлиққа йол қоймайдиғанлиқини әскәртти.

арқидин кеңәш палата әзалириму дөләт мәҗлиси бинасидин тарқақлаштурулди.

йеңидин сайланған пирезидент җо байдин мухбирларни күтүвелиш йиғини өткүзүп: «америка демократийәси вә қанун билән идарә қилиш» қа қаритилған һуҗумларни тохтитишқа чақирди.

байдин трампқа хитаб қилип: «у чоқум камераларниң алдиға чиқип, (дөләт мәҗлиси бинасидики) қоршавға хатимә бериши керәк» деди.

пенсилванийә иштати башлиқи том волф тивиттер арқилиқ елан қилған байанатида, намайишчиларниң пайтәхт вашингтондики дөләт мәҗлиси бинасиға киришигә «сийасий өзгириш» дәп баһа бәрди.

бу өзгиришләрдин кейин трамп дөләт муһапизәтчилириниң «дөләт мәҗлиси бинасидики вәқәләргә арилишиши» тоғрисида йолйоруқ чүшүрди.

нийуйорк валийси андрев куомо өзиниң тивиттер адреси арқилиқ байанат елан қилип: «мән америка дөләт муһапизәтчилириниң тәлипигә бинаән нийуйорктин 1000 муһапизәтчини пайтәхт вашингитонға икки һәптә вәзипә өтәш үчүн орунлаштуруватимән» дегәнләрни қәйт қилди.

доналд трамп иҗтимаий алақә торида учур һәмбәһриләп намайишчиларни «тинчлиқни сақлашқа» чақирди.

җиддийлик күчийип кәткәндин кейин, доналд трамп син көрүнүшлүк учур һәмбәһриләп: «улар биздин сайламни оғрилиди, әмма һазир силәр чоқум өйүңләргә қайтишиңлар керәк» деди.

пирезидент трамп вәқәләр башлиништин илгири бәргән байанатида болса, өзиниң пирезидент сайлимидики мәғлубийитини қобул қилмайдиғанлиқини вә күрәшни тохтатмайдиғанлиқини билдүргәниди.

трамп, 3 – нойабирдики пирезидентлиқ сайлиминиң нәтиҗисини авазға қойуш мәқситидә уйуштурулған дөләт мәҗлиси йиғиниға наразилиқ билдүрүш үчүн вашингтонға топланған қоллиғучилириға оқ өтмәс әйнәкниң арқисида туруп хитаб қилип: «демократчилар партийәсиниң сайламда қаидигә хилаплиқ қилғанлиқи» тоғрисидики әйиблишини тәкрарлиғаниди.

трамп өзиниң сайламниң һәқиқий ғәлибә қилғучиси икәнликини илгири сүрүп: «мән мәғлубийәтни һәргиз етирап қилмаймән, ваз кәчмәймән» дегәниди.