еспер вашингтонға оронлаштурған әскәрләрни чекиндүрүш қарарини қайтурувалди

түркийә авази радийоси хәвири: америка қошма иштатлириниң миннеаполис иштатида 25 - майда қара тәнлик америка пуқраси җорҗ флойдниң сақчиларниң зораванлиқи нәтиҗисидә җенидин айрилишидин кейин башланған наразилиқ һәрикәтлири барғансери күчәйгән һалда давамлашмақта. һөкүмәтниң намайишчиларға техиму қаттиқ қол муамилә қилидиғанлиқиниң има – ишарәтлири кәлмәктә.

америка мудапиә министири марк еспер түнүгүн елан қилған «пайтәхт вашингтонға йеқин базиларға тәдбир мәқсәтлик орунлаштурулған әскәрләрни чекиндүрүш» қарарини қайтурувалди.

бирләшмә хәвәр агентлиқиниң зийаритини қобул қилған америка мудапиә министирлиқи әмәлдарлири, алдинқи күни кәчтә вашингтонға йөткәлгән 1600 әскәрниң түнүгүн ахшамдин тартип бурунқи базилириға қайтидиғанлиқини елан қилғаниди. бирақ, аридин узун өтмәйла, пийадә қисимлар баш катипи рйан макартй йәнә мәзкур агенитлиққа министир есперниң чекиниш қарарини қайтурувалғанлиқини мәлум қилди.

ақсарай байанатчисиму, пирезидент доналд трамп зөрүр дәп қариған тәқдирдә, давамлишиватқан намайишларға қарши һәрбий күч ишлитишни мәзмун қилған исйан қануниниң иҗра қилинидиғанлиқини ейтти.

байанатчи, мухбирларни көтүвелиш йиғинида, асасий қанунниң кишиләрниң пикир әркинлики барлиқини мәзмун қилған қошумчә биринчи маддисиға ишарәт қилған һалда, «қошумчә биринчи мадда, һечкимгә болаңчилиқ қилиш, исйан көтүрүш, биналарға от қойуш, мал – мүлүккә бузғунчилиқ қилиш, хәлқ вә сақчиларға һуҗум қилиш һоқуқини өз ичигә алмайду, бу мадда инсанларниң тинчлиқ усулда йиғилиш өткүзүш һоқуқи барлиқини көрситиду» дегәнләрни қәйт қилди.

йәнә бир тәрәптин, җорҗ флойдни назарәт астиға елиш җәрйанида бойниға тизини қойуш арқилиқ униң өлүмигә сәвәб болған сақчи дерек чаувинға қаритилған әйибләш дәриҗисиниң еғирлаштурулуп, иккинчи дәриҗилик җинайәт садир қилиш билән әйиблинип сотлинидиғанлиқи уқтурулди.

миннеаполис иштати баш мупәттиши кеит еллисон, чаувинниң үчинчи дәриҗилик җинайәтниң орниға иккинчи дәриҗилик җинайәт садир қилиш билән әйиблинип сотлинишиға қарар қилди. чаувин, 8 – ийунда сотлиниду. нәқ мәйдандики башқа үч сақчиниңму җинайәтниң садир қилинишиға йардәм қилиш билән әйиблинип сотлинидиғанлиқи қәйт қилинди.

американиң миннеаполис иштатида 25 майда йүз бәргән вәқәдә, әсли африқалиқ америка пуқраси җорҗ флойд назарәт астиға елиниш җәрйанидики «тиналмайватимән» дегән иңрашлириға қаримай, сақчиниң тизини бойниға қойуп бесишни давамлаштуруши нәтиҗисидә җенидин айрилғаниди.

вәқә, шу күндин буйан америка қошма иштатлириниң барлиқ шәһәрлиридә пат – пат зораванлиқ вәқәлиригә сәһнә болған намайишларниң йүз беришини кәлтүрүп чиқарди.