америка билән талибан келишим имзалиди
афғанистан пирезиденти әшрәф ғениниң америка пирезиденти доналд трамп билән тинчлиқ мусаписини музакирә қилғанлиқи билдүрүлди.
түркийә авази радийоси хәвири: афғанистан пирезидентлиқ мәһкимиси әшрәф ғени билән америка пирезиденти доналд трампниң көрүшкәнлики тоғрисида байанат елан қилди.
афғанистан пирезидентлиқ мәһкимисиниң бу һәқтики байанатта, пирезидент трампниң 29-феврал (2020) да қатарда имзаланған америка-талибан тинчлиқ келишимидин мәмнун болғанлиқини билдүрүп, афғанистан һөкүмитини тәбриклигәнлики қәйт қилинди.
пирезидент трамп тинчлиқ мәсилисидә бундин кейинки басқучларниң иҗра қилиниши мәсилисидә, афғанистан һөкүмитигә ишинидиғанлиқини әскәрткән.
«афғанистанға тинчлиқ елип келиш келишими» дәп нам берилгән келишим, 29-феврал америка билән талибан оттурисида тәхминән икки йил бойичә давам қилған учришишларға саһибханлиқ қилған қатар пайтәхти доһада имзаланди.
келишимгә, америкаға вакалитән американиң афғанистан алаһидә вәкили залмай халилзад, талибанға вакалитән сийасий ишлар ишханисиниң башлиқи молла абдулғәни имза қойди.
америка башчилиқидики бирләшмә қисимниң афғанистанға орунлашқан әскәрләр санини 135 күн ичидә 8600 гә чүшүрүш тәклип қилинған келишимдә, «талибан келишимгә бойсунған әһвалда, америка вә иттипақдашлири 14 ай ичидә барлиқ әскәрлирини чекиндүридиғанлиқи» билдүрүлди.
америка билән талибан оттурисида мәһбусларниң өзара алмаштурулидиғанлиқи әскәртилгән келишимдә йәнә, «талибанниң 5 миң әзаси, қарши тәрәптики миңдин артуқ мәһбусниң, афғанистанда сийасий дийалог башлинидиған 2020-йили 10-мартқичә қойуп берилидиғанлиқи» қәйт қилинди.
келишимдә, талибанниң қойуп берилидиған әзалириниң америка вә иттипақдашлириға тәһдит пәйда қилмаслиқи тоғрисида капаләт берилгәнлики тәкитләнди.
