ғәрб дөләтлиридики вухән вирусиға мунасивәтлик мәлуматлар

түркийә авази радийоси хәвири: шималий иреландийә билән голландийәдиму вухән вирусиға мунасивәтлик вәқәләр көрүлди.

шиветсийәдә бәш кишидә вухән вируси байқалди, буниң билән вухән вируси бимари йәттигә чиқти.

фирансийә пирезиденти макрон париждики питчи салпетхийә (Pitie-Salpetriere) дохтурианисини зийарәт қилип, вухән вирусиға қарши йолға қойулған бихәтәрлик хизмәтлирини көздин кәчүрди.

у: «тарқилишчан вирусқа дуч кәлдуқ, әң йахши усулда қарши турушимиз керәк» деди.

фирансийә вухән вируси билән җенидин айрилғанларниң сани иккигә, йуқумланғанларниң сани 28 гә чиқти. буларниң ичидә төт бимарниң әһвали еғир.

йавропадики дөләтләр ичидә вухән вируси билән әң көп өлүм-йетим һадисиси көрүлгән италийәдә, 17 киши җенидин айрилди, йуқумланғанларниң сани 650 кә чиқти. вирус ломбардийа (Lombardiya) районида әң көп тарқалған болуп, у йәрдә 37 бимарниң әһвали йахшиланған.

испанийәдә вухән вируси билән йуқумланғанларниң сани 14 кә чиқти. пайтәхт мадридта вирус билән йуқумланғанларниң сани төт болуп, йеңидин байқалған икки кишиниң хәтәрлик районларға сайаһәткә бериштин илгири байқалғанлиқи елан қилинди.

гиретсийәдә йәнә, икки кишидә вухән вируси байқалди.

гиретсийә сәһийә министирлиқи 26-феврал сәланик шәһиридә вухән вируси байқалған 38 йашлиқ айалниң оғли билән италийәдә сайаһәттә болған йәнә бир айалдиму вухән вирусиниң байқилиши билән, йуқумланғанлар саниниң үчкә чиққанлиқини елан қилди.

гиретсийә сәһийә министирлиқи мушу һәптә ичидә кткүзүлүши пилан қилинған барлиқ паалийәтләрниң әмәлдин қалдурулғанлиқини билдүрди.

австирийә вухән вируси билән йуқумланғанларниң сани үчкә чиқти.

германийәдә 14 кишиниң йеңидин вирус билән йуқумланғанлиқи байқалди. буниң билән германийәдә, вухән вируси билән йуқумланғанларниң сани җәмий 31 гә чиқти.

американиң калифорнийә иштатида 33 кишидә вухән вируси байқалди.

йеңи зеландийәдиму вухән вирусиға мунасивәтлик тунҗи вәқә көрүлди.

йеңи зеландийә баш министири җасинда ардерн (Jacinda Ardern) ирандин қайтип кәлгән 60 йашлиқ йеңи зеландийә пуқраси болған бир айалда вухән вирусиниң байқалғанлиқини билдүрди.