калифорнийәдә от кәткән кемидики кишиләр қутқузулалмиди

түркийә авази радийоси хәвири: калифорнийә иштатиниң җәнубий деңиз тәвәликидә от кәткән кемидики йоқап кәткәнләрни издәш-қутқузуш хизмәтлири, кемидики 34 кишиниң җенидин айрилғанлиқиниң ениқлиниши билән тохтитилди.

санта барбара (Santa Barbara) наһийәсиниң башлиқи бил бровн издәш-қутқузушта қутқузувелинғанларниң йоқлуқини вә бүгүн (4-сентәбир) дин башлап издәш-қутқузуш ишлириниң тохтитилғанлиқини билдүрди.

у кеминиң астинқи қәвитидә ухлаватқан 34 кишиниң қечиш йоллириниң от йалқуни етилгәнликини вә кеминиң үстүнки қәвитидә ухлиған бәш кемә хадимидин башқа, һечкимниң қутқузулалмиғанлиқини қәйт қилди.

у от кетиш сәвәбиниң тәкшүрүлүватқанлиқини, җенидин айрилған 33 кишиниң йолучи, бир кишиниң болса кемә хадими икәнликини؛ 20 кишиниң җәситиниң деңиздин чиқирилғанлиқини, кеминиң 18 метир чоңқурлуққа чөкүп кәткәнликини әскәртти.

у йәнә, җәсәтләрниң кимликиниң DNA тәкшүрүши нәтиҗисидә ениқлинидиғанлиқини, шуңа аилиләрдин DNA әвришкилири елинғанлиқини қәйт қилди.

америка саһил бихәтәрликини қоғдаш қисминиң байанатчиси моника рочестер (Monica Rochester) алтә кемә хадими вә 33 йолучини өз ичигә алған 39 киши олтурған кемигә, 2-сентәбир күни саәт 03:15 тә намәлум сәвәбләр түпәйлидин от кәткәнликини елан қилған иди.

моника рочестер узунлуқи 23 метир келидиған «консепшин» (Conception) намлиқ ғәвваслар кемисигә, қуруқлуқтин тәхминән 32 километир йирақлиқтики деңиз тәвәликидә санта круз (Santa Cruz) арили әтрапида от кәткәнликини әскәртип: «бир кемидә әң ахирида йүз бериш еһтимали болған иш от, бу сәвәбтин әң начар әһвалға тәййарлиқимиз болуши керәк» дегән иди.