пәләстин әрәб дөләтлирини йумилақ үстәл йиғинини байқут қилишқа чақирди

түркийә авази радийоси хәвири: пәләстин азадлиқ тәшкилатиниң иҗраийә кеңиши ишғал астида туруватқан ийордан дәрйасиниң ғәрбий қирғиқидики рамаллаһ шәһиридә 25-26-ийун күнлири манамада ечилидиған «параванлиқ үчүн тинчлиқ» темисидики йумилақ үстәл иқтисад йиғинини музакирә қилди.

пәләстин азадлиқ тәшкилати йиғиндин кейин елан қилған байанатида, бәһрәйндики йумилақ үстәл йиғиниға қатнишишни рәт қилғанлиқлирини әскәртип: «бу йиғин земин бәдилигә тинчлиқ пиринсипини, пул бәдилигә тинчлиқ пиринсипиға өзгәртишни мәқсәт қилиду» деди.

байанатта, әрәб дөләтлири йиғинни байқут қилишқа вә әрәб тинчлиқ һәрикити қарарлириға садиқ болушқа чақирилди. байанатта йәнә мундақ дейилди:

«пәләстин хәлқи намиға содилишиш үчүн һечкимни вәзипигә тәйинлимидуқ, шуңа бу йиғинниң нәтиҗиси биз үчүн йоққа баравәр. буниңдин башқа, бу йиғинниң һечқандақ һоқуқи вә мәҗбурлаш күчи йоқ.»

байанатта, бәһрәйн йиғини билән охшаш вақитта, ливан пайтәхти бейрутта исламға майил, дөләтчи вә милләтчи әрәб партийәлириниң қатнишиши астида ортақ һалда «хәлқ конферанси» өткүзүш хизмәтлириниң давамлишиши керәклики тәкитләнди.

бәһрәйндә чақирилидиған йумилақ үстәл иқтисад йиғининиң, американиң исираилийә-пәләстин мәсилисини һәл қилишта қачан елан қилиши ениқ болмиған «йүз йилниң келишими» пилани даирисидики тунҗи йиғин болидиғанлиқи қәйт қилинмақта.

пәләстин һөкүмити дәсләптә қатнашмайдиғанлиқини җакарлиған йиғинға тәклип қилиниш еһтимали болған дөләтләргә байқут қилишни чақириқ қилған иди.