بوكو ھارام تېررورلۇق تەشكىلاتىنىڭ نۇرغۇن ئەزاسى يوقىتىلدى

تۈركىيە ئاۋازى رادىيوسى خەۋىرى: بوكو ھارام تېررورلۇق تەشكىلاتى نىگېرىيەنىڭ بورنو ئىشتاتىدىكى ئىككى يېزىغا بېسىپ كىرىشى سەۋەبىدىن چىققان ئېتىشىشلاردا، خەۋپسىزلىك كۈچلىرى ئەڭ ئاز دېگەندە 50 تېررورىستنى ئۆلۈك ھالدا قولغا چۈشۈردى.

بورنو ئىشتاتىدا ياشايدىغان بابانگىدا ئىبراھىم: «ئەبۇبەكىر شەكاۋنىڭ قول ئاستىدىكى تەشكىلات ئەزالىرى دەپ تەخمىن قىلىنغان كىشىلەر كېچىدە ئىككى يېزىغا بېسىپ كىردى، بىراق ئۇلار يېزىلاردىن قوغلاپ چىقىرىلدى» دېدى.

ئۇ يەنە مۇنداق دېدى:

«نىگېرىيە ئارمىيەسىنىڭ پىيادە قىسمىغا، ھاۋا ئارمىيە قىسىملىرى ياردەم قىلدى. تېررورلۇق تەشكىلاتىنىڭ ئەڭ ئاز دېگەندە 50 ئەزاسى ئېتىپ ئۆلتۈرۈلدى، قوراللىرى يىغىۋېلىندى.»

نىگېرىيە ئارمىيەسى تۈنۈگۈن (7-يانۋار) بايانات ئېلان قىلىپ، بورنو ۋە يوبې ئىشتاتلىرىدا ئېلىپ بېرىلغان ھەربىي ھەرىكەتلەردە 100 دىن ئارتۇق بوكو ھارام تېررورلۇق تەشكىلاتى ئەزالىرىنىڭ بىر تەرەپ قىلىنغانلىقىنى بىلدۈرگەن ئىدى.

نىگېرىيەدە 2000-يىللارنىڭ بېشىدىن تارتىپ، باش كۆتۈرگەن بوكو ھارام تېررورلۇق تەشكىلاتىنىڭ 2009-يىلدىن باشلاپ پەيدا قىلغان كەڭ كۆلەملىك زوراۋانلىق ھەرىكەتلىرىدە 20 مىڭدىن ئارتۇق كىشى جېنىدىن ئايرىلدى.

بوكو ھارام تېررورلۇق تەشكىلاتى 2015-يىلدىن بۇيان قوشنا دۆلەت كامېرون، چاد ۋە نىگېر قاتارلىق دۆلەتلەردە ھۇجۇم ۋەقەلىرىنى پەيدا قىلىۋاتقان بولۇپ، چاد كۆلى ئويمانلىقىدىكى ھۇجۇمدا ئەڭ ئاز دېگەندە 2 منىڭ كىشى جېنىدىن ئايرىلغان ئىدى.