малта билән италийә көчмәнләрни қайтурувәтти
малта билән италийәликләр шималий африқилиқ 313 көчмәнни қобул қилишни рәт қилди.
түркийә авази радийоси хәвири: испанийәдики опен армис исимлик бир аммиви тәшкилат, малта вә италийә һөкүмәтлириниң ақдеңизда қутқузуп қелинған 313 көчмәнни қобул қилишни рәт қилғанлиқини уқтурди.
бу аммиви тәшкилат ливийә деңизида конрап кәткән бир кемидин қутқузуп қелинған 313 көчмәнниң башқа бир кемигә йөткәлгәнликини билдүрди.
бу көчмәнләрни қутқузуш үчүн зор хизмәтләрни ишләватқанлиқини билдүргән бу тәшкилат, бу көчмәнләрни малта вә италийә һөкүмәтлириниң қобул қилишни рәт қилғанлиқини уқтурди.
бу әһвал тоғрулуқ мухбирларниң соаллириға җаваб бәргән италийәниң муавин баш министири матто салвани италийә портлириниң көчмәнләргә ечилмайдиғанлиқини ейтти.
ашқун милләтчиләр партийәсиниңму рәһбири болған салвини: опен армис тәшкилати қутқузувелинған көчмәнләрни дәсләп малтаға елип барди, малта бу көчмәнләрдин бир бовақ вә униң анисини қобул қилип башқиларни қобул қилишни рәт қилди, мән шуни очуқ дәймәнки: портлиримиз көчмәнләргә ечилмайду, адәм әткәсчилири вә уларға йантайақ болғучиларға техиму шундақ, деди.
министир салвиниға твиттердин җаваб қайтурған опен армис тәшкилатиниң қурғучилиридин оскар кәмпс: салвини бу гәплиридин һаман бир күни уйулиду, деди.
буниңдин башқа, италийә тәрәққийат ишлири министири данило тонинеллиму твиттер адерисида мундақ мәзмунда учур йазди: «ливийә деңизида көчмәнләрни италийә қутулдурмиди, фирансийә, испанийә йаки башқа дөләтләрниңму бундақ қилғини йоқ, ундақта йавропа иттипақиниң пилани немә? көчмәнләр киризисигә йавропалиқлар бирликтә инкас қайтуруши керәк.»
бу йил ақдеңизда мәйданға кәлгән көчмәнләр вәқәси йавропа иттипақида пат-пат киризис пәйда қилип турди, бу қетимму дәсләп малта билән италийә оттурисида йүз берип арқидин башқа йавропа иттипақи дөләтлиригә кеңәйгән бир көчмәнләр киризиси йүз бәрди, 629 көчмәнни елип маңған акиварис намлиқ кемә бир нәччә күн ақдеңизда тохтитип қойулди, ахири испанийәдики валенкийа порти бу кеминиң киришигә йол қойди вә киризис һәл болди.
италийә һөкүмити ливийә һөкүмитини көчмәнләрни елп маңған кемиләрниң деңиз тәвәликидин өтүшигә көз йумуш, йавропа иттипақини болса көчмәнләр киризисигә чарә тапмаслиқ билән әйибләп кәлмәктә.
