трамп йәнә тәһдит салди
америка пирезиденти доналд трамп демократ партийә көч қанунини қоллимиған вә бу сәвәбтин чеграға там селишқа пул аҗриталмиған тәқдирдә, һөкүмәтни тақайдиғанлиқини ейтип тәһдит салди.
түркийә авази радийоси хәвири: доналд трамп твиттерда һөкүмәтни тақайдиғанлиқи тоғрисида тәһдит селип байанат елан қилди. у: "демократлар чегра темини өз ичигә алған чегра бихәтәрлики үчүн аваз бәрмисә, һөкүмәтни тақашни халаймән. йешил карт латарийәси, тутуш вә әркин қойуветиш қатарлиқ ишлардин қутулуп, лайақәтни асас қилған көчмәнләр түзүмини йолға қойуш керәк. дөлитимизгә қалтис инсанларниң келишигә еһтийаҗимиз бар" деди.
ройтерс вә ипсосниң мушу ай елан қилған рай синаш нәтиҗилиригә асасланғанда, америка сайлиғучилири көч тоғрисида партийәләрниң аваз нисбити бойичә бөлүнгән һаләттә турмақта икән. җумһурийәтчиләрниң %81 и трампни қоллайдикән.
трамп американиң җәнубий чеграсиға там селиш үчүн керәклик хамчотқа еришиш мәқситидә, 2017-йили вәзиписини башлиғандин тартип, бир қанчә қетим һөкүмәтни тақаш билән тәһдит салди. трамп там селиш үчүн тәләп қиливатқан хираҗәт 25 милйард долларға йетиду.
америка кеңәш палатасиниң башлиқи җумһурийәтчи рон җонсон CBS телевизийәсигә байанат берип: "буни пайдилиқ дәп ойлимаймән, бу сәвәбтин буниңдин йирақ турушқа тиришайли" деди.
федератсийә һөкүмитиниң хираҗәтлири тоғрисидики талаш-тартишлар бу йил ичидә дөләт хизмәтлиригә икки қетим пул аҗритишниң тохтап қелишиға сәвәб болди. биринчи қетимлиқи 2018-йил йанвар ейиниң ахирқи һәптисидә, иккинчи қетимлиқи феврал ейида бир қанчә саәтлик үчүн йүз бәрди.
америка конгрәси һөкүмәткә 30-сентәбиргичә пул аҗритиш үчүн хираҗәт тәдбирлири үстидә келишишкә мәҗбур.
җумһурийәтчиләр һәм кеңәш палатаси һәмдә авам палатасини контрол қилсиму, әмма партийәдики мөтидилләр вә консерватиплар оттурисидики келишәлмәслик, тез сүрәттә қанун чиқиришқа тосқунлуқ қилди.
