انتخابی بے ضابطگیوں پر متعلقہ فورمز پر قانونی چارہ جوئی کی جائے: نگراں وزیر اعظم کاکڑ
انوار الحق کاکڑ نے کہا کہ پاکستان کی قانون سازی، عدالتیں اور انتظامی شاخیں لچکدار ہیں، عدالتیں اور انتظامیہ سب کو انصاف فراہم کرنے کیلیے تیار ہیں
نگراں وزیر اعظم انوار الحق کاکڑ کا کہنا ہے کہ انتخابی بے ضابطگیوں کے خدشات کا اظہار کرنے والوں کی حوصلہ افزائی کرتے ہیں، ان پر متعلقہ فورمز پر قانونی چارہ جوئی کی جائے۔
وزیر اعظم آفس کی جانب سے سماجی رابطوں کی سائٹ ایکس پر بیان جاری کیا گیا جس میں انوار الحق کاکڑ کا کہنا تھا کہ ملک میں عام انتخابات جمہوریت کے فروغ کیلیے ایک قدم ہے، الیکشن میں نمایاں ٹرن آؤٹ کو بین الاقوامی سطح پر تسلیم کیا گیا، تمام اسٹیک ہولڈرز کو احساس ہو ہار جیت جمہوری عمل کا پہلو ہیں۔
انوار الحق کاکڑ نے کہا کہ پاکستان کی قانون سازی، عدالتیں اور انتظامی شاخیں لچکدار ہیں، عدالتیں اور انتظامیہ سب کو انصاف فراہم کرنے کیلیے تیار ہیں۔
انہوں نے کہا کہ پُرامن احتجاج اور اجتماع بنیادی حقوق ہیں لیکن کسی قسم کے تشدد یا اکسانے والوں کو معاف نہیں کیا جائے گا، تشدد کرنے والوں کے خلاف قانون اپنا راستہ اختیار کرے گا۔
ان کا کہنا تھا کہ نازک وقت میں انتشار برداشت نہیں کیا جائے گا، دشمنوں کے ایجنڈے کو بڑھانے کیلیے انتشار پھیلایا جاتا ہے، استحصال اور امن و امان کے چیلنجز پیدا کرنے کیلیے انتشار پھیلایا جاتا ہے۔
انوار الحق کاکڑ نے کہا کہ نگراں حکومت صبر و تحمل کی درخواست کرتی ہے، سیاسی جماعتیں حکومت بنانے کیلیے مشاورت کر رہی ہیں امید ہے یہ عمل باہمی افہام و تفہیم سے جلد از جلد اختتام پذیر ہوگا۔
متعللقہ خبریں
پاکستان کا پہلا سیٹلائٹ خلائی مشن آئی کیوب چاند کے مدار میں کامیابی سے پہنچ گیا
آئی کیوب قمر سے چاند کی پہلی تصویر 15 یا 16 مئی تک موصول ہو نے کا امکان ہے