وزیراعظم عمران خان کی زرعی شعبے کی بحالی اور کاشتکاروں کو سہولتیں فراہم کرنے کی ہدایت

وزیراعظم عمران خان نے کہا ہے کہ زرعی شعبے کی ترقی اولین ترجیحات میں شامل ہے اور حکومت اس سلسلے میں تمام ممکنہ اقدامات کرے گی۔

انہوں نے یہ بات منگل کے روز اسلام آباد میں زراعت کے بارے میں قومی رابطہ کمیٹی کے اجلاس کی صدارت کرتے ہوئے کہی۔

وزیراعظم عمران خان نے اجلاس سے خطاب کرتے ہوئے کہا کہ 1960ء کے بعد ملک میں زرعی شعبے کی ترقی پر کوئی توجہ نہیں دی گئی۔

انہوں نے کہا کہ ملک کی ترقی میں زرعی شعبے کے کردار کو مدنظر رکھتے ہوئے اور کاشتکاروں کی فلاح و بہبود کا خیال کرتے ہوئے موجودہ حکومت نے اس شعبے کو ترجیحی بنیادوں پر مستحکم بنانے کا عزم کر رکھا ہے۔

وزیراعظم نے ہدایت کی کہ ایسا لائحہ عمل تشکیل دیا جائے جس سے کاشتکاروں کو زیادہ سہولتوں اور سازگار ماحول کی فراہمی یقینی بنائی جا سکے اور ملک میں زرعی ترقی کے نئے ویژن کے تحت زراعت کے مختلف شعبوں کی بحالی عمل میں آئی۔

اجلاس کو ملک کے زرعی شعبے کی ترقی ،مویشیوں کی افزائش کی بحالی اور کاشتکاروں کی خوشحالی کو تمام متعلقہ فریقوں کے مشورے سے فروغ دینے کیلئے مختصر ،درمیانی اور طویل مدت کے لائحہ عمل پر عملدرآمد کی مربوط حکمت عملی کے بارے میں تفصیل سے بتایا گیا۔