بھارتی پولیس نے ایک مرحوم اور 93 سالہ بزرگ مسلم کو بلیک لسٹ کر دیا

وزیر اعظم عمران خان نے بھارتی میڈیا کی ایک خبر کے حوالے سے اپنی ٹویٹ میں لکھا ہے  کہ اترپردیش کی پولیس نے ایک غیر اخلاقی حرکت کرتے ہوئے  6 سال قبل انتقال کرجانے والے ایک مسلمان شخص اور 93 سالہ بزرگ شہری کا نام بھی امن و امان کے ماحول  میں خلل ڈالنے والے افراد کی فہرست میں شامل کردیا ہے۔

عمران خان نے کہا کہ بھارتی پولیس اپنی پستی کی حدوں کو چھو رہی ہے اور ظلم و بربریت کی نئی مثالوں پر اپنی مہر ثبت کر رہی ہے اور  سفاک مودی سرکار کے مسلم کش ایجنڈے کے تحت ہندوستان میں مسلمانوں کا قتل عام جاری ہے۔

بھارت میں مودی حکومت نے متنازع قانون منظور کیا ہے جس کے تحت مسلمانوں کے سوا دیگر مذاہب کے تارکین وطن کو شہریت دی جائے گی۔ اس قانون کے خلاف ملک بھر میں شہریوں کی بڑی تعداد سراپا احتجاج ہے۔ مودی حکومت نے احتجاج کو کچلنے کے لیے سختی سے کام لیا اور سینکڑوں مظاہرین کو قتل اور زخمی کر ڈالا ہے  جن میں اکثریت مسلم طبقے کی ہے۔